Jaqynda redaksııaǵa habarlasqan Q.Armanbaeva atty azamat óziniń eńbek kitapshasynyń daýly bolǵan paraǵyn jiberip, tómendegi mán-jaıdy túsindirip berýdi surady. Onda eńbek paraqshasynyń 5 jazbasynda hat joldaýshy 24.05.1989 jyly Almaty «Qurylys» birlestigine qarjyger bolyp qabyldanǵan eken. Al ol jumystan 10.06.1993 jyly óz erkimen bosaǵan. Biraq osy jyldar aralyǵynda, ıaǵnı 1991 jyly Qazaqstan óz táýelsizdigin jarııalaǵany belgili. Mine, osyny jeleý etken Zeınetaqy jáne áleýmettik qamsyzdandyrý bólimi: «Siz 10.06.1993 jyly jumystan shyqqanda paraqqa burynǵy, ıaǵnı eski mór basylǵan, sondyqtan bul úsh jyl sizdiń zeınetaqy jyldaryńyzǵa enbeıdi», depti. Mundaı jaǵdaıda men ne isteýim kerek dep suraıdy hat ıesi. Jalpy, mundaı sıpattaǵy máselelerdiń kóptegen adamdardy tolǵandyryp júrgeni de ras. Sondyqtan biz bul jaǵdaıda ne isteý qajettigin bilý úshin advokat Seıfýlla ShYŃǴYSQA jolyǵyp, zańgerlik keńes berýin suradyq.
– Qazaqstan Respýblıkasynyń burynǵy Densaýlyq saqtaý jáne áleýmettik damý mınıstriniń 2015 jylǵy 30 qarashadaǵy «Eńbek kitapshalarynyń nysanyn, olardy júrgizý jáne saqtaý qaǵıdalaryn bekitý týraly» № 929 buıryǵynyń 11-tarmaǵynda: «Eńbek kitapshasynda qyzmetkerdiń eńbek qyzmeti týraly jańsaq nemese naqty emes jazbalar anyqtalǵan jaǵdaıda, ózgeristerdi tıisti jazbany engizgen jumys berýshi júzege asyrady», dep jazylǵan. Oǵan qosa 12-tarmaǵynda: «Eger jańsaq nemese naqty emes jazbalardy engizgen jumys berýshi – zańdy tulǵa qaıta uıymdastyrylsa, ózgeristerdi onyń quqyqtyq mırasqory engizedi», dep taıǵa tańba basqandaı kórsetken.
Demek, Q.Armanbaevaǵa osy buıryqtyń negizinde, aldymen, 1989-1993 jyldar aralyǵynda jumys jasap ketken mekemeniń quqyqtyq mırasqoryn tabý kerek. Iаǵnı ataýy basqa memlekettik organ. Eger ol mekemeniń quqyqtyq mırasqorlary anyqtalmaǵan jaǵdaıda sotqa eńbek ótilin esepteý úshin belgili bir kásiporynda nemese basqa tulǵada jumys isteý faktisin anyqtaý týraly aryzben júginýge quqyǵy bar. Talap aryzǵa eńbek kitapshasynan bólek, memlekettik muraǵattyń anyqtamasy, zeınetaqy taǵaıyndaıtyn mekemeniń resmı jaýaby, jumys ornynan alǵan marapattaý qaǵazdar jáne basqa da qujattardy tirkeý qajet, sonymen qatar sol ýaqytta birge jumys istegen áriptesterdi kýá retinde sotqa shaqyrýǵa bolady. Sot sheshimimen bul kisiniń sol memlekettik mekemede jumys jasaǵandyǵyn anyqtap bergen jaǵdaıda, zeınetaqy taǵaıyndaıtyn mekeme zańdyq kúshine engen sot sheshiminiń negizinde esepke alynbaı qalǵan jyldardy eńbek ótiline jatqyzady.
Jazyp alǵan
Aleksandr TASBOLAT,
«Egemen Qazaqstan»