Ortalyq kommýnıkasııalar qyzmetinde Memlekettik bilim berý jınaqtaý júıesine arnalǵan baspasóz máslıhaty ótti. Sharaǵa «Qarjy ortalyǵy» AQ prezıdenti Asqar Ybraıymov, Bilim berý qyzmetterine aqy tóleý júıesin damytý departamenti dırektorynyń orynbasary Tilesh Ybraev, departament menedjeri Alpamys Satybaldın qatysty.
Asqar Ybraıymovtyń aıtýynsha, 2013 jyly Memleket basshysynyń bastamasy boıynsha halyqqa joǵary oqý oryndary men kolledjderde bilim alýda qarjylyq qoldaý kórsetý úshin qarajat jınaqtaýdyń jańa júıesin engizýdi kózdeıtin «Memlekettik bilim berý jınaqtaý júıesi týraly» zań qabyldanǵan.
«Memlekettik bilim berý jınaqtaý júıesi depozıtteriniń basty artyqshylyǵy salymdarǵa 12 prosentke deıin banktiń jyldyq syıaqysynan bólek, memleketten syılyqaqy tólenedi. Memleket syılyqaqysynyń mólsheri qarapaıym, qatardaǵy otbasylar úshin jyldyq 5 prosent, áleýmettik qorǵalmaǵan otbasylar úshin 7 prosentti quraıdy. Búginde 403 stýdent MBJJ sheńberinde bilim alyp júr», dedi Asqar Ybraıymov.
Departament menedjeri Alpamys Satybaldın bul júıe halyq arasynda «bilim depozıti» degen atpen tanymal ekenin tilge tıek etti.
«Bul baǵdarlamaǵa sáıkes kez-kelgen Qazaqstan azamaty ózine nemese óziniń balasyna bilim depozıtin ashyp, bankten alatyn syıaqynyń ústine qosymsha úkimetten syıaqy ala alady. Jınaqtalǵan qarjyny Qazaqstanda bolsyn, shetelde bolsyn joǵary oqý ornynda bilim alýyna qoldanýǵa bolady. Jalpy, bul baǵdarlama ekinshi deńgeıli bankter arqyly júzege asyrylady. «Halyq banki», «Nur Bank», «Sesnabank», «VTB» bankteri osy baǵdarlamanyń qatysýshylary. Aıta ketetin taǵy bir jaıt, jaqyn Azııa elderi ishinde Qazaqstan atalǵan júıeni alǵashqy bolyp qolǵa alyp otyr. Al bul baǵdarlama dúnıe júzi boıynsha 9 memlekette iske asyrylyp keledi. Kóbinese olarda «jeke shottar» degen atpen belgili. 9 memlekettiń ishinde Belgııa, Kanada jáne taǵy basqa elder bar. Alǵashqy salynatyn jarna úsh aılyq eseptik kórsetkishti quraıdy. 2018 jyly bul 7215 teńgege teń. Iаǵnı bilim depozıtin ashý úshin shotyńyzǵa 7215 teńge salasyz. Jalpy osy baǵdarlama iske qosylǵaly beri 403 stýdent Memlekettik bilim berý jınaqtaý júıesi sheńberinde bilim alyp jatyr. Biz jyl saıyn bul kórsetkishtiń kóterilip kele jatqanyn baıqaımyz», dedi ol.
Raýan QAIDAR,
«Egemen Qazaqstan»