Balalardyń jazǵy demalysyn tıimdi uıymdastyrýda lagerdiń orny bólek. Bıyl atyraýlyq balalar qaladaǵy «Besikti», Mahambet aýdanyndaǵy «Araı», Inder aýdanyndaǵy «Jas órken» jáne Reseıdiń Jeleznovodsk qalasyndaǵy «Qazaqstan geology» pansıonatynda demalyp jatyr.
«О́tken jyly 100 myńnan astam oqýshy jazǵy demalysta lagermen qamtyldy. Italııada 40 bala, Kókshetaý men Qapshaǵaıda, Almatyda 48 649 bala demaldy. Bıyl da oblys ákimdiginiń qoldaýymen osy jumystar jalǵasyn tapty», deıdi oblystyq bilim berý basqarmasynyń bólim basshysy Almagúl Qaıyrlıeva. Osy maqsatqa jergilikti bıýdjetten 597 mln teńge bólingen, onyń jartysynan astamy «Araı» lagerin kúrdeli jóndeýge jumsaldy. Endi «Tulpar» lagerine jóndeý jumystary bastalady. Qala syrtyndaǵy demalys oryndarynan bólek oblystaǵy 149 bilim berý uıymynda mektep lagerleri ashyldy. «Teńizshevroıl» kompanııasynyń demeýshiligimen joǵary synypta oqıtyn daryndy balalarǵa arnalǵan Novosibir jazǵy fızıka-matematıka mektebiniń jumysy uıymdastyrylyp otyr. Lagerge barmaǵan balalar úshin de demalysty kóńildi ótkizýge múmkindik bar. Mysaly, «Nur beles» qoǵamdyq birlestigi «Jeti qazyna» aýla klýbyn qolǵa aldy. «Jeti qazyna», «Beıbarys», «Hıýaz», «Dostyq» aýla klýbtary oblys ortalyǵyndaǵy tórt shaǵyn aýdanda jumys isteıdi. Oblystyq jastar saıasaty máseleleri basqarmasynyń basshysy Rollan Quspannyń aıtýynsha, aýla klýbtary – balalar men jasóspirimderdiń bas qosatyn, shyǵarmashylyq ıdeıalaryn júzege asyratyn jáne bos ýaqyttaryn tıimdi ótkizetin oryn, klýbtar ashylǵaly beri qyzyǵýshylyq tanytyp, úıirmelerge jazylyp jatqan balalardyń da qatary kóp. Dúısenbi-senbi aralyǵynda tańerteńgi saǵat 9.00-den keshki 20.00-ge deıin jumys isteıtin aýla klýbtarynda 7-29 jas aralyǵyndaǵy balalar men jastar aǵylshyn tili, dombyra, ólketaný, jas ekolog, qolóner, ústel tennısi, shahmat, doıby, drama úıirmelerine tegin qatysa alady.
Baqytgúl BABASh, «Egemen Qazaqstan»