ÝEFA Eýropa lıgasynda synǵa túsken Qostanaıdyń «Tobyl» komandasy atalǵan týrnırdiń ekinshi irikteý kezeńi aıasyndaǵy qarymta kezdesýde Erevanda Armenııanyń «Pıýnık» klýbyna qarsy oınap, jeńilip qaldy.
Syrt alańdaǵy match á degennen-aq «Tobyldyń» qaýipti shabýyldarymen bastaldy. Onysy túsinikti edi. Eger alań ıeleri bir gol soǵatyn bolsa, kelesi kezeńge ótý múmkindikteri joǵarylaıdy. О́ıtkeni «Pıýnıktiń» Qostanaıda soqqan bir goly bar. Al «Tobyl» gol soǵatyn bolsa, onda bizdiń komanda kelesi kezeńge joldama alady.
Eki komanda arasyndaǵy oıynnyń birinshi bóligi teń nátıjemen aıaqtaldy. Alǵashqy taım «Tobyl» komandasynyń jıi shabýyldap, qarsylas qaqpaǵa jıi-jıi qaýip tóndirýimen este qaldy. Degenmen, teń esep alań ıelerin qanaǵattandyrmaıtyn bolǵan soń, Armenııa komandasy ekinshi taımdy joǵary qarqynmen bastady. Matchtyń 82 mınýtynda «Pıýnık» klýby óz degenderine jetti. «Tobyl» aıyp alańynyń aldyndaǵy qarbalas sátti tıimdi paıdalanǵan qarsylas komandanyń oıynshysy Mohamed Konate esepti ashyp, komandasyn alǵa shyǵaryp qana qoımaı, Eýropa lıgasynyń úshinshi kezeńine alyp shyqty.
Qaqpasyna gol ótkizip alǵan soń «Tobyl» búkil komanda bolyp shabýylǵa shyqqanymen, gol soǵa almady. Esep match sońyna deıin ózgerissiz qaldy. Osylaısha, syrt alańda soqqan bir goldyń arqasynda «Pıýnık» jarystyń kelesi kezeńine ótti.
Qostanaıda ótken alǵashqy oıynda «Tobyl» 2:1 esebimen jeńiske jetken bolatyn.