Jýyrda Býrabaı kýrorttyq aımaǵyndaǵy «Baldáýren» respýblıkalyq oqý-saýyqtyrý ortalyǵynda jas geologtardyń V qazaqstandyq ashyq dalalyq olımpıadasynyń ashylý saltanaty boldy.
Sharaǵa Geologııa jáne jer qoınaýyn paıdalaný komıtetiniń tóraǵasy Aqbatyr Nadyrbaev, Parlament Májilisiniń depýtaty – Galına Baımahanova, Reseı Federasııasynyń bala-jasóspirimdik geologııalyq qozǵalysynyń ortalyq keńesiniń tóraǵasy, jer qoınaýyn paıdalaný boıynsha Federaldy agenttiktiń bas mamany Svetlana Iаshına, «Munaıshy-geologtardyń qazaqstandyq uıymy» AQ prezıdenti Baltabek Qýandyqov sóz sóılep, olımpıada qatysýshylaryna sáttilik tiledi.
Sharanyń qonaqtary «Jas geolog» birlesken qoryna olımpıadany uıymdastyrǵany úshin alǵys bildirdi. Sondaı-aq olımpıada jastardyń kásiptik baǵytyna, geologııa ǵylymyn zert- teýge oqýshylardyń qyzyǵýshylyǵyn arttyrýǵa, ósip kele jatqan urpaqqa geologııany ǵylym retinde dáripteýge baǵyttalǵany aıtyldy.
Olımpıadaǵa qatysyp jatqan 20 komandanyń ishinde Reseı Federasııasynan Qyrǵyz Respýblıkasynan, О́zbekstannan kelgen qonaqtar bar. Aıta ketýimiz kerek, 2010 jyly I qazaqstandyq olımpıadada barlyǵy 8 komanda qatysqan bolatyn. Atap ótetin jaıt, jas geologtardyń tek komanda sany ǵana emes, daıyndalý deńgeıi de ósken.
Geologııa jáne jer qoınaýyn paıdalaný komıtetiniń tóraǵasy olımpıadaǵa qatysý – teorııalyq jáne praktıkalyq bilimińdi kórsetýdiń jaqsy múmkindigi ekenin atap ótti. Qatysýshylardyń ishinen kóbi óz ómirin óte romantıkalyq mamandyqtyń birimen baılanystyratynyna úmit artty jáne jaqsy kóńil-kúı, jarysta sáttilik tiledi.
Olımpıada qatysýshylaryn geologııalyq tilmeler men kartalardy qurý, marshrýttar salý, mıneralogııa jáne petrografııa negizderinen bilim saıystyrý kútip tur. Jas geologtardyń V Qazaqstan ashyq dalalyq olımpıadasy 27-shilde men 3-tamyz aralyǵynda ótedi.
«Egemen-aqparat»