ÝEFA Chempıondar lıgasynda synǵa túsip jatqan elordanyń «Astana» komandasy atalǵan týrnırdiń ekinshi irikteý kezeńi aıasyndaǵy qarymta kezdesýde Danııa chempıony «Mıdtıýlland» klýbyna qarsy oınap, teń nátıjege qol jetkizdi. Eki oıyn qorytyndysy boıynsha týrnırdiń kelesi kezeńine joldama aldy.
Danııanyń Hernıng qalasynda ótken jaýap kezdesýde oıynnyń birinshi mınýtynan bastap shabýyl shebinde Kongo DR shabýylshysy Jýnıor Kabananga oınady. Astanadaǵy alǵashqy machta Roman Murtazaev shyqqan-dy. «Astana» komandasynyń bas jattyqtyrýshysy Roman Grıgorchýk qarymta matchqa osyndaı ózgeris jasady. Qarsylas komanda sapynda da ótken oıynmen salystyrǵanda bir oıynshy ǵana ózgergen eken. Eki komanda quramynda azdaǵan ózgeris bolǵanymen, oıyn dál birinshi kezdesýdegideı ótti.
«Men búgingi oıynda tyń ózgeristerdiń bolýy múmkin ekendigin bilgen edim. Eger shyndyǵyna keler bolsaq, Danııa chempıonatyndaǵy qarsylastardyń oıynyn kórip, jaýap kezdesýine shyǵatyn quramyn dál taptym. Keshegi oıyn Astanadaǵy kezdesýmen salystyrǵanda aıtarlyqtaı erekshe boldy deı almaımyn. Múmkin, jankúıerlerdiń qyzý qoldaýy kezdesý barysyna basqasha atmosfera bergen bolar», deıdi Roman Grıgorchýk.
Komandalar kezdesýdiń alǵashqy mınýttan-aq gol soǵýdyń qamyna kirisip, oıyndy belsendi bastady. Ásirese, alań ıeleri jyldam gol soǵýǵa tyrysyp baqty. Degenmen «Astana» qorǵanysy syr bermeı, qaýipti shabýyldardyń betin qaıtaryp jatty. Oraıy kelgende qaqpashy Erıch te alys-jaqynnan baǵyttalǵan soqqylardy dál ańdap, danııalyq komandanyń shabýylshylaryn attap bastyrmady. Grıgorchýk shákirtteri de jıi shabýyldap, Hansenniń ábden mazasyn qashyrǵan. Sondaı sátterdiń birinde 19 mınýtta Kabananga gol da soqqan. Alaıda ıspanııalyq tóreshi Hýan Martınes bul taza goldy eseptemeı tastady.
95 mınýtqa sozylǵan oıynda esep ashylmaı, Astanadaǵy alǵashqy kezdesýde 2:1 esebimen jeńiske jetken elordanyń «Astana» komandasy Chempıondar lıgasynyń úshinshi kezeńine joldama aldy. Endi «Astana» komandasy kelesi kezeńde Horvatııanyń «Dınamo» komandasymen «Astana Arena» stadıonynda 7 tamyz kúni kezdesedi. Zagrebtiń komandasy ekinshi irikteý kezeńde Izraıldiń «Hapoel» klýbyn eki matchtyń qorytyndysy boıynsha 7:2 esebimen jeńgen.