Tarıhı-ólketaný murajaıynda «Ejelgi Tarazdyń qazynalary» atty kórme ashyldy. Onda eki myń jyldyq tarıhy bar kóne shahar jaıly jan-jaqty syr shertetin 250-den astam qymbat eksponat qoıylǵan.
Jambyl oblysy boıynsha tarıhı-mádenı eskertikishterdiń jalpy kólemi úsh myńnan asady eken. Olardyń ishinde IýNESKO-nyń búkilálemdik muralar tizimine engizilgen Balasaǵun, Aısha bıbi, Qarahan baba sekildi injý-marjandardyń orny erekshe. «Ejelgi Taraz eskertkishteri» tarıhı-mádenı qoryq-murajaıynyń dırektory Rýstam Bıkenov kórmeniń «Rýhanı jańǵyrý» baǵdarlamasy aıasynda uıymdastyrylǵanyn, sońǵy kezderi murajaılardyń serpindi damýyna úlken kóńil bólinip otyrǵanyn, osy oraıda jergilikti jerderden tysqary ornalasqan rýhanı ortaq kıeli oryndarmen jas býyndy tanystyrý qazaqstandyq patrıotızm qasıetterin qalyptastyrýdyń bir tetigi bolyp tabylatynyn jetkizdi.
Kórmegen kelýshiler arheologııalyq qazba jumystari negizinde tabylǵan qundy jádigerlerdi tamashalap, Úısin, Qarahandar dáýiriniń, Qarluq qaǵanatynyń sol kezdegi ómir saltyn, tynys-tirshiligin kóz aldaryna elestetkendeı boldy. Qoryq-mýzeıdiń ekskýrsııa jetekshisi Aqjan Orazbaqovanyń aıtýynsha Uly Jibek jolyn boılaı qonǵan Taraz naǵyz saýda-sattyq ortalyǵyna aınalǵan. Hımııalyq suıyqtyqtar, ıis sýlar quıatyn qumyralar men qutylar sol kezeńnen jetken kórinedi. Mys, altyn, kúmisten soǵylǵan tıyndar 8-12 ǵasyrlardaǵy órkenıetke tıesili. Áıelderdiń áshekeı zattary, qyshtan jasalǵan ydystar has sheberlerdiń qolynan shyqqanyn ańǵartady. О́rnek, Qostóbe qalashyqtary, Dáýitbek, Tekturmas keseneleri jaıly da mol maǵlumattar toptastyrylǵan. Bular elimizdiń kıeli nysandaryna jatqyzylypty.
«Oblys ákiminiń tapsyrmasy boıynsha barlyq murajaılar tegin jumys isteıdi. Sonyń arqasynda kelýshilerdiń sany eki esege artty. Soltústikqazaqstandyqtar óz tarıhyn ǵana jaqsy bilýmen shektelmeý kerek. Elbasynyń tarıhyn bilmegen ulttyń bolashaǵy bulyńǵyr degen sózin jadymyzdan shyǵarmaǵan jón», dedi kórmeniń ashylý rásiminde sóılegen sózinde mádenıet, arhıvter jáne qujattamalar basqarmasynyń basshysy Ermek Rahımov.
Osyndaıda Memleket Basshysynyń «Ulytaý tórindegi tolǵanys» suhbatyndaǵy «Shyǵysqa barsań-Berel qorǵany bar. Ortalyqqa kelseń-qalmaqtarmen soǵysqan Ańyraqaı shaıqasy ótken jer bar. Batysqa barsań-Altyn Ordanyń handary turǵan Saraıshyq sııaqty qasıetti meken bar. Ońtústikke barsań-Túrkistan tur. Qazaqstanda osyndaı qasıetti jerler kóp» degen» sózi eske túsedi. Tamyry óte erteden bastalatyn osyndaı tarıhymyzdyń bir kindigi Taraz ekeni talassyz. Osy oıdy sheteldik aıno ORano Oklets te qýattaıdy. Germanııadan Uly Dala tósine saıahattap, Qyzyljar óńirine at basyn tiregen ol kórmeden zor rýhanı lázzat alǵanyn aıtady. Qazaqtyń shetsiz, sheksiz dalasyn velosıpedpen aralap júrgen saıahatshy kórikti jerlerdiń moldyǵyna tańdanysyn jasyra almaıdy.
О́mir ESQALI,
«Egemen Qazaqstan».
Soltústik Qazaqstan oblysy.