Astanada zaman­aýı qurylǵylarmen jasaqtalǵan smart-oryndyqtar ornatyldy

Elbasy Nursultan Nazarbaev bıylǵy Jol­daýynyń onynshy taraýyn «Aqyldy qalalar» «aqyldy ult» úshin» degen taqyrypqa arnap, zamanaýı tehnologııalar jyldam ósip kele jatqan megapolıstiń problemalaryn tıimdi sheshýge birneshe jol usynǵan bolatyn. Memleket basshysy óz sózinde «Smart sıtı» tujyrymdamasy men qalaǵa qonys aýdaratyn adamdardyń quzyretterin damytý negizinde qalalyq ortany basqarýdy keshendi túrde engizý qajet» dedi.

Shynymen de bas qalamyzdyń zamanaýı qalyptasýy jáne Eýrazııanyń mańyzdy damý orta­lyq­tarynyń qataryna qosylýy barshamyzdyń ortaq minde­timiz. Joldaýda aıtylǵan meje­li mindetter elimizde kezeń-kezeńi­men sátti júzege asa bastady. 

Sonyń biri jýyrda Astananyń sol jaǵalaýynda ornatylǵan 39 smart oryndyq. Atalǵan «aqyldy oryndyqtardy» elordanyń 20 jyldyǵyna oraı Pavlodar oblysy syıǵa tartyp otyr. Pavlodar oblysy ákimdiginiń baspasóz qyzmeti habarlaǵandaı, zaman­aýı qurylǵylarmen jasaqtalǵan oryndyqtardyń smartfondarǵa blıýtýz arqyly qosylý jáne dınamıka arqyly mýzyka tyńdaý qyzmetteri bar. Sondaı-aq uıaly telefondardy symsyz jáne USB port arqyly qýattaýǵa bolady. Oryndyqtarǵa elektr qýaty oǵan ornatylǵan kún batareıalary arqyly keledi. Eń bastysy, bul oryndyqtar velosıpedshiler úshin turaq qyzmetin atqarady. 

Smart oryndyqtardyń jańa velojol mańaıyna ornatylǵan sebebi de sol. О́ıtkeni Astana kúnine tartý etilgen 56 shaqyrym velojolda pavlodarlyqtardyń da úlesi bar. Jeti oblys atynan, ıaǵnı Pavlodar, Atyraý, Túrkistan, Soltústik Qazaqstan, Qostanaı, Aqmola jáne Jambyl oblystary tartý etken velojol Esil ózeniniń sol jaǵalaýy, EKSPO kesheni arqyly ótip, qala baǵynyń shańǵy-rollerlik trassasy men Qaraótkel aýylynan bastalatyn «jasyl beldeý» arqyly ótetin velosıped jolyn baılanystyrady. 

Pavlodar oblysynyń atynan tabys etilgen jol men «aqyldy oryndyqtar» ERG kompanııa­sy qarajatynyń esebinen salyn­ǵa­nyn aıta ketkenimiz jón. 

Baǵasy 1,2 mln teńge turatyn smart-sákilerdiń úsh jylǵa deıin kepildik merzimi bar. «Smart sıtı» standartyn qalyptastyrýdyń bir úlgisi retinde osy «aqyldy oryndyqtardy» ataýǵa bolady. Rasymen de «Aqyldy qalalar» óńirlik damýdyń, ınnovasııany taratýdyń jáne elimizdiń barlyq aýmaǵynda turmys sapasyn arttyrýdyń jobasyna aınalady.

Aıta keteıik, mundaı smart oryndyqtar Petropavl, Qa­raǵandy sııaqty oblys ortalyq­taryna da qoıyla bastady. «Aqyl­dy qala» baǵdarlamasy aıasynda júzege asyp jatqan jobalardy jańa turpatty Qazaqstannyń je­tistikteri qatarynda ataýǵa tolyq negiz bar.

Mıras ASAN,

«Egemen Qazaqstan»