Patrıottar jastarǵa ıek artady

Qazaqstan Patrıottary partııasynyń elimizdiń ár­bir aýdanyndaǵy bas­taý­ysh partııa bólimsheleriniń  hat­shylary Astanaǵa ar­naıy at arytyp kelgen bolatyn. Solarmen bolǵan basqosýda   saılaý dodasynyń jaıy talqylanyp, aldaǵy mindetter jan-jaqty py­syq­taldy. Osy rette partııa mú­sheleriniń nazary Jańa­ózendegi jaǵdaıǵa da aýdy. Qazaqstandy álem jaqsy ja­ǵynan tanyp, ekono­mı­ka­lyq turǵydan kúsh ala tú­sip kele jatqan tusta osyn­daı keleńsizdiktiń or­yn alýy elimizdiń bedelin túsirip tastady, dedi olar. Qazaqstan Patrıottary par­tııasy saılaýaldy shta­by­nyń jetekshisi Bolat Beısembaev endigi basty másele oqıǵanyń anyq-qanyǵyn anyqtaý degendi alǵa tartty. Bolat Qabdolulynyń sózine qaraǵanda, partııa elimizdegi ózge de saıası kúshtermen birlese otyryp, atalǵan oqı­ǵanyń anyq-qanyǵyn anyq­taý maqsatynda qurylǵan arnaıy komıssııanyń jumy­syna belsene qatyspaqshy eken. Al atalǵan partııanyń serkesi Ǵanı Qasymov se­na­torlyq jumystan qol úzbeı, saıası dodanyń bel orta­synda júrgendigin aıta ketken jón. Kóbinese qara­paı­ym saılaýshylar partııa­nyń atyn senatormen tikeleı baı­lanystyrady. Partııa je­tekshisi elimizdiń álemniń neǵurlym básekege qabiletti memleketteriniń alǵashqy elýliginiń qataryna engendigin moıyndaı oty­ryp, bar­lyq máselede ashyqtyq bo­lýyn basty ustanym retinde alǵa tartyp keledi. Sondaı-aq partııa qazirgi júzege asyp kele jatqan otbasy men balalardy qoldaý, adam áleýetin ashý baǵytyndaǵy ulttyq jobalarmen jumys isteý eldi damytýdyń basty faktory dep biledi. Partııa baǵdarlamasynda bul maqsattardy júzege asy­rý úshin el ekonomıkasynyń turaqty ósýin qamtamasyz etý kerek delingen. Son­dyq­tan da kásiporyndarǵa aýqym­dy jańǵyrtýlar jasaý, memlekettik jáne jergilikti basqarý júıesin jetildirý, shaǵyn jáne orta bıznesti damytý men qol­daý basty nazarǵa alynǵan. Ja­qynda Ǵ.Qasymov eli­mizdiń ońtústik astanasy – Almaty qalasyna baryp, saılaýaldy tuǵyrnamada kór­­setilgen mindetterdi jan-jaqty túsindirý baǵy­tynda birqatar sharalar ótkizip qaıtty. Endigi ju­mys óńirlerde qyzatyn bolady. Budan basqa Patrıottar partııasynyń beldi múshe­leri óńirlerge shyǵyp, elek­toratpen tikeleı ju­mys isteýdi myqtap qolǵa alýdy bastap ta ketti. Ár­bir aýdan, aýyldardy ara­laýmen qatar, zaýyt, fab­rıkalardyń jumysshy­la­ry­­men de kezdesý ótkizý jos­parlanyp otyr eken. Tipti Qazaqstan Pat­rıotta­ry partııasynyń atynan fýt­bol komandasyn qura­tyn­dyqtary da belgili boldy. Mundaı ıgi shara­nyń astarynda jastardy sportqa úndeý arqyly, saılaý naýqanyna belsendi tartý jatqandyǵy anyq. Asqar TURAPBAIULY. Astana.