Áne-mine degenshe oqý jylynyń bastalýyna da az ýaqyt qaldy. Jaz mezgiliniń eki aıy zymyrap óte shyqty. Ásirese bul mezgildiń mektep oqýshylary úshin qyzyqty bolatyny sózsiz. Jaz boıy tynyqqan balalar jańa oqý jylynda da bilim básekesine daıyn bolady. Sapaly bilim alyp, ony kádege jaratýǵa umtylady.
Talas aýdanyna qarasty «Juryndysaı» memlekettik saýyqtyrý orny bar. Munda jyl saıyn júzdegen bala kelip demalyp, jaz maýsymyn oıdaǵydaı ótkizedi. Atalǵan lager 100 oryndyq ashanamen, 5 shaǵyn jataqhanamen qamtylǵan. Kelýshilerge arnalǵan basseınmen qatar, birneshe dýsh ta bar. Al mundaǵy ashyq alańqaı sporttyq jattyǵýlar jasaýǵa qolaıly. Bul jerdegi tunyq tabıǵattyń keremeti sol, syldyrap aqqan taý bulaǵy, sol taýdan esken samal jel jan jadyratady. «Juryndysaı» lageriniń joǵary deńgeıde jumys atqarýyna aýdan ákimi Dosmahanbet Álıev árdaıym qoldaý bildirip keledi.
Jýyrda qart Qarataýdyń qoınaýyndaǵy «Juryndysaı» lagerinde 100 balanyń qatysýymen óner saǵaty ótti. Munda úshinshi aýysymda 12 kún boıy demalǵan búldirshinderdiń júzinen qýanysh lebin ańǵarý qıyn emes edi. Bir ǵajaby, osynda jınalǵan balalardyń barlyǵy da ónerli eken. Biri oqý ozaty, biri ánshi, biri kórkemsóz oqýdan baıqaý jeńimpazy, biri erkin kúresten oblystyq básekede júldeger, biri bıshi. Lagerde ótken óner saǵatynyń ereksheligi de osynda bolsa kerek. Bul rette balalardyń da tárbıeshi aǵaılar men apaılarǵa degen rızalyǵy sheksiz. Keýdelerin maqtanysh sezimi kernegen balalar munda «Neptýn túni» sharasynyń kýási bolǵandaryn, sondaı-aq fýtbol, asyq atý, voleıbol, júgirý, sekirý sııaqty oıyn túrlerine qatysqandaryn jarysa aıtty. Ári olar munda kóp dos tapqan. Elimizdiń bolashaǵy sanalatyn búldirshinderdiń tátti tilekterine súısinbeske bolmaıdy.
Tarıhy sonaý 1965 jyldan bastaý alatyn bul lagerdi Darhan Báıimbetov degen azamat basqarady eken. Ol osy ýaqytqa deıin 300 oqýshy demalyp qaıtqanyn, endi balalar úshin tórtinshi maýsym bastalatynyn jetkizdi. Elý jyldan astam ýaqyttan beri jumys istep kele jatqan demalys orny bir kezde jekemenshikke satylyp keteıin dep turǵan jerinen Rústem Seńgirbaev degen azamattyń aralasýymen aman qalǵan. Endi mine, tarıhy tereń Talas jerinde balalarǵa qýanysh syılap kele jatqan «Juryndysaı» lageri áli de el bolashaǵyna qyzmet kórsete bermek.
Hamıt Esaman,
«Egemen Qazaqstan»
Jambyl oblysy