Jetisýdyń Úıgentas óńirinde «Jamantas» atty jaılaý bar. Teńiz deńgeıinen ólshegende 2500 metr bıikte eken.
Osy jalpaq quba jon ózara jalǵasa kele Jońǵar Alataýyna jymdasyp bitedi. Aınala jasyl álem. Taý basynda ósken qaraǵaı, arshadan kóz tunady. Myńsan túrli dárilik shóp te aıaq astynda ósedi. Jazy salqyn, końyrsamaldy aýmaq. Taýdyń arǵy etegi – Qytaı eli. Qyrdy qýalap memlekettik shekara ótedi. Qyraǵy shekarshylardan bólek mal baqqan sharýanyń shubaǵan izi saırap jatyr. Myńǵyrǵan mal. Qysqasy, qazaqtyń erteden ánge qosqan «Beljaılaýy» osy shyǵar...
Qazir bul jaılaýdy Jylandy, Lepsi aýylynyń malshylary jaılap otyr. Osy ólkeniń óreni, «Jersý» korporasııasynyń prezıdenti, belgili mesanat Baýyrjan Ospanovtyń asyl tuqymdy jylqy sharýashylyǵynda myń basqa jýyq kúlik bar. Munan bólek tabyn-tabyn sıyr da ósip jatyr. Túıe túligi de osy mańdy jaılaǵan. Aıaqty mal qarashanyń yzǵary qonyp, qar qalyńdaǵansha «Jamantasta» jaıylyp, qystamaǵa keledi. Taý sýyq bolǵanymen, «Jamantastyń» qysy malǵa jaıly deıdi jylqyshy qaýymy. Janýarlar qystan azyǵyn teýip taýyp, óleń shópke aýyz bylǵamaı erkin shyǵady eken. Sodan bolar qońyn joǵaltpaǵan maldyń ónimi de mol bolmaq. Et pen sút óndirýge taptyrmaıtyn jol. Munyń syrtynda, tabıǵı azyqpen qorektengen jylqy júrsike shydamdy, qýatty keledi eken. Salt júriste shaldyqpaıdy. Ádette taza qandy, ıakı arab tuqymynan shyqqan janýarlardyń tuıaǵy taýly ólkede tasyrqap, eńisti ári bıik joldarda 2 saǵattan artyq júriske shydamaıdy. Al qazaqtyń tól tuqymynan taraǵan jabylar dál osy «Jamantas» jonynda saǵatyna 10 shaqyrym jerdi erkin ıgere alady. Kózimiz jetkesin aıtyp otyrmyz...
Jaqynda Baýyrjan Ospanovtyń shaqyrýymen bir top azamat Lepsi aýylyna at sýytyp, ary qaraı taý jolymen seıil qurdy. Mádenıet jáne sport mınıstri Arystanbek Muhamedıuly bastap, Almaty oblysy ákiminiń orynbasary Jaqsylyq Omar qostaǵan salt attylyar sherýi 50 shaqyrymǵa sozylǵan taý jolymen júrip ótip, «Jamantas» jaılaýyna jetip bel jazdy. Salt atqa minip, seıil qurǵandar arasynda qazaqtyń áıgili sportshylary da boldy. Boksshy Qanat Islam, aralas jekpe-jek jeńimpazy Arman Ospanov, Olımpıada chempıony Baqtııar Artaev, kúmis júldeli chempıon Nurbaqyt Teńizbaev sııaqty jigitter taqymyndary tıgen atpen taý bókterlep júrip ótti. Jáne bul seıildiń mańyzy men máni bólek boldy. Qazir tutas elimizdegi sııaqty Jetisý óńiride de týrızmdi damytýǵa erekshe kóńil bólip otyr. Al kóńildi demalys izdep, tabıǵatqa qumartqan adam úshin taý týrızminiń túrli joldaryn usyný qajet. О́tkende Alakóldiń jaǵasynda dýatlonnan jarys ótken bolatyn. Sol kezde jankúıerler men uıymdastyrýshylar tarapynan «Nege salt atpen serýendep, taý arasynda demalatyn marshrýttar ashpasqa?» degen tilek aıtylǵan edi. Kásipker Baýyrjan Ospanov qaǵilezdik tanytyp, sol maqsatqa jol ashýǵa kirisipti. Buıyrsa, Jetisýdyń Alakól óńiri tek jaǵajaı týrızminen bólek taý arasynda atpen serýendeýge qyzyqqan adamdar úshin jańa demalys orynyna aınalady. Ekologııalyq týrızmniń fanattary úshin dál osy «Jamantas» jaılaýyndaǵydaı tumsa tabıǵatqa kóz qandyryp, qazaqtyń qymyzy men sirne-qýyrdaǵyna qaryn toıdyryp qaıtýdan artyq rahat bolmas edi. Al atqa minýdiń jóni tipten bólek. Tazy júgirtip, qus ushyratyn dástúrli ańshylyq jolyn da jańǵyrtýǵa múmkindik bar.
- Qazaqty at ústinen kórýdiń ózi baqyt qoı. Ári ulttyq dástúrdi ulyqtaý men salamatty ómirdiń saltyn ustanýdyń taptyrmaıtyn joly at sportyn damytý. Biz bul jerde kásibı sporttan bólek, kóńili qalaǵan árbir adamnyń atqa minip, tabıǵatta serýendeýine múmkindik beretin buqaralyq baǵytty qolǵa alyp otyrmyz. Oǵan bizde barlyq jaǵdaı bar. Adamdardy qyzyqtyryp, qulaqtandyryp osyndaı demalys túrlerin damytpaqshymyz, - dedi sharaǵa qatysqan Mádenıet jáne sport mınıstri Arystanbek Muhamedıuly.
Qalmahanbet MUQAMETQALI,
«Egemen Qazaqstan»
Almaty oblysy
Sýretterdi túsirgen Jeńis Ysqabaı