Jakartada ótetin jazǵy Azııa oıyndarynda áıelder arasyndaǵy boksshylar saıysynda Qazaqstannyń namysyn úsh sportshy qorǵaıdy. Olar – almatylyq Nazym Qyzaıbaı jáne astanalyq Sánııa Sultanqyzy men Rımma Volosenko.
Bul bylǵary qolǵap sheberleriniń esimderi jankúıerlerge jaqsy tanys. 51 keli salmaqta óner kórsetetin Nazym Qyzaıbaıdyń eki dúrkin álem chempıony degen dardaı ataǵy bar. Sonymen qatar, ol el birinshiliginiń birneshe dúrkin jeńimpazy. 57 keli salmaqtaǵy Sánııa Sultanqyzy men 60 keli salmaqtaǵy Rımma Volosenko da elishilik jarystarda jasyndaı jarqyrap, halyqaralyq dodalarda mol tájirıbe jıǵan myqtylar.
-Qazirgi kezde sońǵy daıyndyq jumystaryn pysyqtaýdamyz. Qyzdardyń baby jaqsy. Olar Indonezııadan qur qol qaıtpaımyz dep qulshynyp otyr. Bul jarystaǵy bizder úshin basty qarsylastarymyz Qytaı, Úndistan jáne Soltústik Koreıanyń boksshylary bolmaq. Basqa da memleketterde de myqty sportshylar jeterlik. Qalaı bolǵanda da Azııa oıyndarynda shákirtterim tabysty óner kórsetip, el senimin aqtaý úshin barynsha kúsh salady, – deıdi Qazaqstannyń áıelder quramasynyń bas bapkeri Vadım Prısıajnıýk.
Ǵalym SÚLEIMEN,
«Egemen Qazaqstan»