Parlament Senatynyń depýtattary Marat Taǵymov pen Muhtar Jumaǵazıev Aqtóbe oblysynyń Shalqar, Yrǵyz jáne Áıteke bı aýdandarynda bolyp, agroónerkásip sektorynda tikeleı jumys jasap júrgen sharýa qojalyqtarynyń tóraǵalarymen, jergilikti jerdegi mekeme, kásiporyn basshylarymen, quqyq qorǵaý organdarynyń ókilderimen, oblystyq jáne aýdandyq máslıhattar depýtattarymen kezdesti, dep habarlaıdy QR Parlamenti Senatynyń baspasóz qyzmeti.
Depýtattar kezdesý barysynda Parlamenttiń zań shyǵarý qyzmeti týraly saılaýshylarǵa aqparat berdi. Sonymen birge aýyl sharýashylyǵyn, kásipkerlikti damytý, shaǵyn nesıeleý, turǵyn úımen, aýyz sýmen, gazben qamtamasyz etý, avtojoldardy jóndeý, halyqty jumyspen qamtý, áleýmettik qamsyzdandyrý, densaýlyq saqtaý, ınternet baılanysyn damytý, keıbir salalardaǵy kadr jetispeýshiligi jáne áleýmettik nysandardy salý sııaqty máselelerdiń elimizde sheshilý jaıyn áńgimeledi.
Kezdesýge qatysqan shalqarlyqtar aýyl sharýashylyǵy salasynan zeınet demalysyna shyqqan ardagerlerdiń zeınetaqysynyń tómen ekeni, oǵan koeffısıenttiń durys qosylmaı otyrǵany, aýyl sharýashylyǵynda eńbek etetin kadrlardyń tapshylyǵy týraly jáne basqa da ózekti máselelerdi kóterdi.
Shalqar qalasynyń mıkroklımatyn qalyptastyryp otyrǵan Shalqar kóliniń qazirgi jaǵdaıymen, jeke kásipker Sáýle Dáýletalınanyń memlekettik-jekemenshik áriptestik aıasynda salyp jatqan kúndizgi stasıonar emhanasynyń qurylysymen tanysty. jetispeýshiligin qozǵady.
Depýtattar Qazaqstan Respýblıkasyndaǵy jer qatynastaryn retteý, sonymen birge agroónerkásip keshenin damytý boıynsha zańnamalarǵa keń kólemde toqtalyp ótti. Aýyl sharýashylyǵy salasynyń mamandary men sharýashylyq qurylymdarynyń ókilderin naqty jumys barysynda kezdesetin máseleler boıynsha usynystar berýge shaqyrdy, olardyń zań qabyldaý barysynda eskeriletinin atap ótti.
Jıyn barysynda depýtattarǵa balyq aýlaý týraly zańnamaǵa ózgerister engizý, Yrǵyz aýdanynyń aýmaǵyndaǵy Jamanshyń meteorıt krateriniń mártebesin anyqtaý, Táýip, Jaısańbaı eldi mekenderine kóterme jol tartý máseleleri jóninde saýaldar qoıdy.
Kezdesýden soń halyq qalaýlylary Yrǵyz aýdandyq prokýratýrasynda, aýdandyq sotta, aýdandyq ishki ister bóliminde, Yrǵyz-Torǵaı memlekettik tabıǵı rezervatynda, sondaı-aq jýyrda paıdalanýǵa berilgen «Qamqor» úıinde boldy. Yrǵyz aýylyndaǵy aýdan ákimdiginiń, 300 oryndyq mekteptiń jáne dene shynyqtyrý saýyqtyrý kesheniniń qurylysymen tanysty.
Al Áıteke bı aýdanynyń Qarabutaq aýyldyq okrýgi men Qyzyljuldyz aýyldyq okrýgterinde bolǵan senatorlar M. Taǵymov pen M. Jumaǵazıev áleýmettik ǵımarattardy aralady. «Batys Eýropa – Batys Qytaı» tas jolynyń boıynda ornalasqan «Maıak» kempınginde boldy. Sondaı-aq Qarabutaq aýyldyq okrýgindegi «Jastyq» stadıony men kásipker Q. Qoılybaevtyń demeýshiligimen «Týǵan jerge taǵzym» aksııasy boıynsha salynyp jatqan «Ákeler» saıabaǵyn aralap, jańa qurylystarǵa oń baǵalaryn berdi.
Senatorlar Qyzyljuldyz aýyldyq okrýginde gaz qubyrlarynyń tartylý jumystarymen tanysty.
Budan keıin senat depýtattary «Komsomol» JShS-nyń egis alqabynda boldy. Egin orý naýqanyna jumylǵan sharýa qojalyqtarynda dıqandarmen áńgimelesti.