QALYŃ TOPTA KELEMIZ

Vankýverde ótip jatqan HHI qysqy Olımpııa oıyndary bel ortadan aýdy. Jarys kestesiniń kósh basyndaǵy memleketter arasyndaǵy aıqastyń naǵyz qyzatyn tusy osy. О́ıtkeni, ázirge eshbir komanda óziniń ústemdigin pash etip, qalyń toptan qara úzip kete alǵan joq. Al solardyń árqaısynyń aıaqalysy jaıynda aıtar bolsaq, tartystyń tórtinshi táýliginde birinshi orynǵa shyqqan AQSh áli de aldyna jan salar emes. Amerıkalyqtardyń qorjynynda 7 altyn, 7 kúmis jáne 10 qola medal bar. Kósh basyndaǵy komandany tuǵyrdan taıdyrýǵa Germanııa, Norvegııa jáne Shveısarııanyń múmkindigi zor. Osy kúnge deıin olar bas júldeni bes-besten olja­lap, aldaǵy jarystarda alǵa qoıǵan maqsatymyzdy qalaı da júzege asyramyz dep qulshynyp otyr. Ońtústik Koreıa men Kanada sport­shy­lary tórt retten jeńis tuǵyry­nyń eń bıik satysyna kóteril­se, Shvesııa­nyń qorjy­nynda úsh altyn me­dal bar. Endi sońǵy kúnderi órbigen ja­rys­tar jaıynda aı­taıyq. Senbi men jeksen­bi kúnderi 10 medal­dar jıyntyǵy sarap­qa salyndy. Bul rette kóshbas­shy elderdiń órenderi taǵy da sheber­liktiń shynaıy úlgisin kór­setti. Ádettegideı AQSh, Norvegııa, Shvesııa, Germanııa, Gollandııa, Kanada, Shveısarııa syndy azýly komandalardyń qarqyny kúshti boldy. Atalmysh memleketterdiń ánurandary kún saıyn shyrqalyp, týlary táýligine bir emes, birneshe márte Vankýver aspanynda jel­biredi. Snoýbordshy Tora Braıt­tyń alǵ­yrlyǵynyń arqasynda alys­taǵy Avstra­lııa halqy Olımpıada altyny­nyń syńǵyryn estidi. Skeletonshy Emı Ýılıams bas júlde oljalap, Ulybrıtanııanyń shynaıy áleýetin baıqatty. Estonııa, Latvııa, Horvatııa jáne Slovenııa syndy shaǵyn ǵana elderdiń ul-qyzdary da jarys jo­lyn­d­a jankeshtilik tanytyp, jeńis tuǵyrynan qol bulǵady. Ol az dese­ńiz, bul kúnderi Ońtústik Koreıa oǵ­lan­­darynyń aıy ońynan týyp tur. Buǵan deıin kárister úsh altynǵa ıelik etse, jeksenbidegi short-trek saıy­synda Lı Djýn Sý shashasyna shań juqtyrmaı, olımpıadalyq rekordty jańartty. Qazaqstannyń sportshylary ótken apta sońynda aýyz toltyryp aıtarlyqtaı nátıje kórsete alǵan joq. Taý shańǵysynan (sýper­gıgant) Igor Zakýrdaev baq synap, 60-oryndy qanaǵat tutty. Shańǵy­dan (dýatlon) áıelder 15 shaqy­rym­ǵa júgirdi. Qorytyndy esepte jerlesterimiz mynadaı oryndarǵa jaıǵasty: Svetlana Malahova­ – 25, Oksana Iаskaıa – 33, Elena Kolo­mına – 28 jáne Marına Matro­sova – 48. Dýatlonnan erlerdiń 30 shaqyrymdyq báse­kesinde Evgenıı Velıchko men Sergeı Cherepanov kúsh synasty. Ekeýi de qalyń toptyń arasynda qalyp qoıdy. Konkıshilerdiń 1500 metrlik básekesinde Denıs Kýzın 23-orynmen shekteldi. Tuǵyrdan sekirýde (K-125) Alekseı Korolev 39-oryn alsa, Nıkolaı Karpenko irikteýden óte almady. Frıstaıl­shylar saıysynda (akrobatıka) Jibek Arapbaeva synǵa tústi. Alaıda qandasymyz áıgili sport­shylarmen ıyq tirese almady. Jibekke buıyrǵany – 23-oryn. Kúni keshe Vankýverde aıdy aspanǵa shyǵaryp, Qazaqstanǵa Olım­pıada júl­desin syıǵa tartqan Ele­na Hrýs­­tale­va­men jolyǵyp, az­dy-kemdi suhbat­tasý­dyń sáti tústi. ­– Men Reseıde týyp-óstim. Onyń sapynda talaı baı­raqty básekede top jardym. Alaıda keıinnen ulttyq qurama bapker­leri­men til tabysa al­maı, Belarýs eline qonys aý­darýǵa máj­búr bol­dym. Ol jaq­ta da kóp turaq­tamadym. So­dan eki oıly bolyp júrdim. Bul – men úshin aýyr kún­der boldy. Biraq boıymda kúsh-qýat barda bıik belesterdi ba­ǵyn­­dyra ala­ty­ny­ma kámil sen­dim. Sol se­nim meni Qazaq­stanǵa jete­lep ákeldi. Jer­gi­likti bapkerler, sport basshy­lary, qara­paıym halyq meniń tasa­da qalyp qoı­maı, jaýap­ty jarys­tar­da jasyndaı jarq eteti­ni­me esh kúmán keltirgen joq. Mine, osyndaı túsi­nistiktiń arqa­syn­da aıym ońy­nan týdy. Men óz ornymdy taptym dep oılaımyn. Sportshy retinde baǵym­dy ashyp, myqtyly­ǵymdy moıyn­datýǵa múmkindik bergen Qazaq eline degen meniń alǵysym sheksiz, – dep Elena aǵynan jaryldy. Keshe alty medaldar jıyn­tyǵy úshin talas órbidi. Qazaq­stannyń sportshylary taý shań­ǵysy men bıatlonnan synǵa tústi. Alǵashqy synaq Igor Zakýrdaev úshin asa sátti bolmady. Ol qalyń toptyń arasynda qalyp qoıdy. Bıatlonnan mass-start jarysyna tek 30 úzdik sportshy ǵana qatysý múmkindigine ıe boldy. О́kinishke qaraı, erlerimizdiń arasynan ondaı myqty shyqpady. Al qyzdar básekesinde Elena Hrýs­taleva óz ónerin ortaǵa saldy. 12,5 sha­qyrym­dyq mass-start báse­ke­sinde otan­dasymyzǵa kil myq­tylarmen taıtalasýǵa týra keldi. Alaıda, bul jarysta Elenanyń joly bol­mady. Ol nebary 27-oryndy mise tutty. Sondaı-aq, shaıbaly hokkeıden toptyq básekeler aıaqtaldy. Úsh topqa bólingen komandalar arasyn­da eń kóp upaıǵa ıelik etken tórt ujym jarystyń pleı-off báseke­lerine shyqty. Qalǵandary tórt-tórt joldama úshin talasqa túsedi. Shırek fınaldyq oıyndar 25 aq­pan­da ótedi. Al búgingi bizder úshin basty doda shańǵydan erler men áıelder quramasynyń komandalyq sprınti. Ǵalym SÚLEIMEN, arnaıy “Egemen Qazaqstan” úshin – Vankýverden.