Eńbek jáne halyqty áleýmettik qorǵaý mınıstrligi sıfrlandyrý kúnin ótkizdi. Shara EKSPO qalashyǵyndaǵy Astana Hub aýmaǵynda uıymdastyryldy. Oǵan vıse-mınıstr Narıman Muqyshev qatysty.
Jıynǵa IT salasynyń bıznes ókilderi men óz isterin jańadan bastap jatqan kásipkerler, birqatar IT mamandary shaqyrylǵan eken. Sharada Eńbek jáne halyqty áleýmettik qorǵaý vıse-mınıstri ózderi tarapynan sıfrlandyrý baǵytynda atqaryp jatqan jumystar jaıyn baıandady. Sońynda suraq-jaýap formatyna aýysyp, kelýshilermen ózara pikir almasyldy. Qatysýshylar IT-tehnologııalar salasyndaǵy óz tájirıbelerimen de bólisti.
«Biz salany sıfrlandyrý máselesinde IT kompanııalarmen tyǵyz jumys isteımiz. Sebebi avtomattandyrý-sırflandyrý máselesinde IT-naryqtaǵylardyń tájirıbesi men usynystary asa mańyzdy. Munyń qarapaıym mysaly retinde Elektrondy eńbek bırjasyn (EEB) ataýǵa bolady», dedi vıse-mınıstr.
N.Muqyshev Elektrondy eńbek bırjasynyń jumysy jáne elektrondy eńbek kelisimsharttaryn engizý týraly keńinen áńgime órbitti. Ol baza – búginde qurylǵan jáne «Sıfrly Qazaqstan» memlekettik baǵdarlamasynyń alǵashqy iske asyrylǵan jobasy. Onyń aıasynda azamattardy jumysqa ornalastyrý prosesi elektrondy formatqa kóshirilip, jumys izdeýshiler men vakansııalardyń iri bazasy qalyptasqan. Mınıstrliktiń aqparatyna súıensek, búgingi kúni EEB qyzmetin 58 myń jumys berýshi men 225 myń jumys izdeýshiler paıdalanǵan. Sondaı-aq EEB arqyly 203 myń azamat jumysqa ornalastyrylyp, onyń bazasynda 36 myń bos oryn men 91 myń túıindeme jarııalanǵan.
«Elektrondy eńbek bırjasy qazir jumys istep jatyr. Endi sonyń aıasynda birqatar jańa baǵyttar ashýdamyz. Mysal retinde «saǵattar aýtsorsıngi» jobasyn ataýǵa bolady. Biz jumysqa ornalastyrý tetigi boıynsha lot arqyly naryqqa shyǵaramyz. Iаǵnı, «Eger myna azamattardy jumysqa ornalastyratyn bolsańyz, biz sizge aqsha tóleımiz» deıtin bolamyz», dedi N.Muqyshev. Vıse-mınıstrdiń aıtýynsha, atalǵan joba shamamen osy jyldyń qazan aıynda iske qosylatyn bolady.
«Sondaı-aq enbek.kz saıtynda biliktilik dárejesi kórsetilgen azamattardy jumysqa ornalastyrýǵa arnalǵan belgili bir lot ornalastyrylady. Azamattar turaqty jumysqa ornalastyrylǵan jaǵdaıda memleket tóleıtin qarajat kólemi de kórsetiledi. Olardyń turaqty jumysqa ornalastyrylýy mańyzdy. Bir-eki aı jumys istep, odan soń jumystan bosatylýy jaramsyz», dedi mınıstrdiń orynbasary.
Málim bolǵandaı, qazirgi ýaqytta 45 jekemenshik jumyspen qamtý agenttigi Elektrondy eńbek bırjasyn qoldanyp otyr. 2018 jyldyń qańtar-tamyz aılary aralyǵynda olar 8182 bos oryndy jarııalaǵan.
Aıta keterligi, búgingi tańda eńbek, jumyspen qamtý, áleýmettik saqtandyrý, zeınetaqymen jáne áleýmettik qamsyzdandyrý, áleýmettik qoldaý kórsetý, arnaýly áleýmettik qyzmetter jáne kóshi-qon sekildi vedomstvo qyzmetiniń barlyq baǵyttary boıynsha birneshe kishi aqparattyq júıeni qamtıtyn Áleýmettik-eńbek salasynyń biryńǵaı aqparattyq júıesi jumys isteıdi. Jalpy mınıstrlik «Sıfrly Qazaqstan» baǵdarlamasy aıasynda negizinen úsh aýqymdy jobany júzege asyrýda. Onyń birinshisi – basty mindetteriniń biri halyqqa kórsetiletin qyzmetterdiń sapasyn arttyrý bolyp tabylatyn Áleýmettik-eńbek salasynyń biryńǵaı aqparattyq júıesin damytý. Áleýmettik-eńbek salasyn sıfrlandyrýdyń ekinshi úlken jobasy bul – Elektrondy eńbek bırjasy. Úshinshi úlken joba – elektrondy eńbek sharttaryn esepke alý júıesin engizý. Barlyq atalǵan sharalar eleýli ekonomıkalyq tıimdilikke qol jetkizýge, halyqtyń ómir súrý sapasyn arttyrýǵa septigin tıgizbek. Sıfrlandyrý kúni, mine, osy sharalardyń áli de jetildirilip, qolǵa alynǵan jobalardyń laıyqty júzege asýyna barynsha kúsh salynatyny aıtylyp, josparlar taǵy bir pysyqtaldy.
Dınara BITIK,
«Egemen Qazaqstan»