Qoǵamdyq keńes otyrysy barysynda qala qaýipsizdigi máselesin sheshý joldary talqylandy. Endi Almaty qalasynda qylmystyń aldyn alý úshin 16 myń sergek kamera ornatylady. Bul týraly qalalyq Qoǵamdyq keńes otyrysynda Ishki ister bóliminiń basshysy Serik Kúdebaev aıtty. Onyń aıtýynsha, sergek kameralardy jol boıyna ornatqannan keıin jol-kólik apatynyń kórsetkishteri tómendegen. Endi osy tájirıbe jaıaý júrginshiler joly men kópshilik oryndarda da qoldanylady. Qazir megapolıstegi qoǵamdyq oryndardaǵy kameralar eskirgen. Al, iri megapolıstiń shet jaǵyndaǵy keıbir kóshelerdiń boıynda kamera ornatylmaǵan. Sol sebepti barlyq kóshelerge kamera ornatylyp, eskirgen kameralar jańartylady.
«Taldaý jobasy boıynsha qala ákimdiginen árbir aýdanǵa 2000 sergek kamera ornatýǵa qarjy bólindi. Bul megapolıste qoǵamdyq oryndar men kóshe boılaryna 16 myń beınebaqylaý kamerasy ornatylady degen sóz. Sol arqyly qoǵamdyq oryndardaǵy qylmysty tómendetý maqsaty qoıylyp otyr. Eger bul joba júzege assa shahardaǵy barlyq turǵyn úılerdiń aýlalaryndaǵy kameralardy da taldaý jobasyna qosamyz. Bul tártip saqshylaryna jedel áreket etýge kómektesedi», dedi qalalyq Ishki ister bóliminiń basshysy Serik Kúdebaev.