QR Prezıdenti «Qorǵas» pen «Quryq» porttary qurylysyna jumyldyrylǵan qurylysshylarǵa alǵysyn aıtty.
Quryq portyndaǵy kólik habyn tanystyrýǵa arnalǵan telekópir barysynda «Aqjigit - Beıneý» respýblıkalyq avtojolynyń qurylysshylary jáne «Qorǵas - Shyǵys qaqpasy» Arnaıy Ekonomıkalyq Aımaqtaǵy qurǵaq porttyń jumyskerleri baılanysqa shyqty.
«Qazirgi sátte «Qorǵas» qurǵaq porty turaqty konteınerlik poıyzdardy «Quryq» porty baǵytyna, sondaı-aq ary qaraı Transkaspıılik dálizben Eýropaǵa jóneltpek. Atalǵan logıstıkalyq tizbek Qytaı, Kavkaz jáne Eýropa úshin tartymdy bolyp otyr. Osy oraıda birqatar elderdiń mýltımodaldyq baǵdarlaryn baılanystyratyn poıyzdyń júrýine ruqsat berińiz», dedi «Qorǵas-Shyǵys qaqpasy» AEA BK» AQ Bas dırektory Murat Baımuhanbetov.
О́z kezeginde Elbasy atalǵan turaqty konteınerlik poıyzdyń qozǵalysyn bastaýǵa ruqsat berdi.
«Biraz ýaqyttan beri «Qorǵasty» tolyq qýatyna qosý úshin jumys istep kelemiz. Bolashaqta Qorǵas úlken shaharǵa aınalady jáne júk ótkizýde aýqymdy torap bolady. Meniń oıymsha, Qytaı provınsııalary osy port arqyly júkterin tasymaldaıdy. Sáıkesinshe, bizdiń Ortalyq Azııadaǵy barlyq kórshilerimiz ben Reseı bul portty paıdalaný múmkindigine ıe. Atqarǵan jumystaryńyz úshin alǵysymdy bildiremin», dedi QR Prezıdenti.