Qazaqstan Prezıdenti «DP World» kompanııasy basqarmasynyń tóraǵasy Sultan Ahmed bın Sýlaıemmen kezdesti, dep habarlaıdy Aqordanyń baspasóz qyzmeti.
Kezdesý barysynda Memleket basshysy «DP World» kompanııasynyń júk tasymaly men logıstıka salasyndaǵy jetistikterin atap ótti.
– Sizder álemdegi 78 termınaldy basqaryp, 6 qurlyqtaǵy 42 elmen jumys isteısizder. Biz úshin sizderdiń mol tájirıbelerińiz asa mańyzdy, birlesip jumys isteýge daıynbyz, – dedi Nursultan Nazarbaev.
Qazaqstan Prezıdenti ınvestısııa tartý úshin jasalyp jatqan elimizdegi jaǵdaıǵa erekshe toqtalyp, Quryq porty erkin ekonomıkalyq aımaǵynyń basymdyqtary jóninde aıtty.
– Biz jańa jol saldyq, Alashankoý men Qorǵas arqyly ótetin eki jol tartyldy. Osylaısha, biz Shyǵys Qytaı provınsııasynan Qazaqstan, Ortalyq Azııa, Reseı, Parsy shyǵanaǵy, Qara teńiz jáne Jerorta teńizi arqyly Eýropaǵa júk tasymaldaý kólemin tolyq qamtamasyz etip otyrmyz, – dedi Nursultan Nazarbaev.
Kompanııa jetekshisi Memleket basshysyn Quryq porty mýltımodaldy termınalynyń iske qosylýymen quttyqtap, Qazaqstanda transulttyq tasymaldaýshylardyń jumys isteýine qolaıly jaǵdaı jasalǵany úshin alǵys bildirdi.
– Men Sizdiń sińirgen eńbegińizdi joǵary baǵalaıtynymdy taǵy da atap ótkim keledi. Bul jobanyń júzege asyrylýy, shyndyǵynda, ǵajaıyp is bolyp sanalady. Sebebi ınfraqurylymǵa qarjy salmaı, Qazaqstanda ǵana emes, sondaı-aq osy óńirde ekonomıkalyq turǵydan jetistikke jetý múmkin emes. Biz óz tutynýshylarymyzdyń maqsattary men qajettilikteri úshin Aqtaý portynyń jumysyna múddeli bolyp otyrmyz, – dedi Sultan Ahmed bın Sýlaıem.
Sońynda Qazaqstan Prezıdenti «DP World» kompanııasynyń basshysyna ózara tıimdi yntymaqtastyq jolynda zor tabys tiledi.