Aqtaý qalasynda Besinshi Kaspıı sammıtiniń qarsańynda qazaqstandyq taraptyń tóraǵalyǵymen Kaspıı mańyndaǵy memleketter Syrtqy ister mınıstrleriniń keńesi ótti, dep habarlaıdy QR SIM baspasóz qyzmeti.
Keńestiń jumysyna Ázerbaıjannyń syrtqysaıası vedomstvosynyń basshysy Elmar Mamedıarov, Irannyń - Djavad Zarıf, Qazaqstannyń - Qaırat Ábdirahmanov, Reseıdiń - Sergeı Lavrov jáne Túrkimenstannyń - Rashıd Meredov qatysyp, aldaǵy joǵary deńgeıdegi «Kaspıı bestigi» kezdesýine daıyndyq jumystaryn qorytyndylady.
«Búgin biz ilgerilemeli kelisimge umtylý jáne ózara tıimdi sheshimderdi tabýdyń arqasynda Kaspıı teńizindegi ózara árekettesýge qatysty barlyq máseleler boıynsha konsensýske kele aldyq. Bunyń aıǵaǵy retinde prezıdentterge qol qoıýǵa usynylǵan Kaspıı teńiziniń quqyqtyq mártebesi týraly konvensııanyń jobasy bolyp tabylady», - dedi Q.Ábdirahmanov. Atqarylǵan jumys Kaspıı mańyndaǵy memleket basshylarynyń belsendi atsalysýy men jeke kóńil bólýiniń arqasynda júzege asyrylǵany atap ótildi.
Kaspıı mańy memleketteriniń syrtqy ister mınıstrleri Besinshi Kaspıı sammıti barysynda qol qoıýǵa josparlanǵan Kaspıı teńiziniń quqyqtyq mártebesi týraly konvensııanyń erejelerin júzege asyrý boıynsha taraptardyń keleshek áreketterin beıneleıtin hattamany qabyldady.