Qoǵamnyń az qamtylǵan músheleri qaı kezde de qoldaýǵa zárý. Sonymen qatar aýyldy abattandyrý, turǵyndarǵa kómek kórsetý sııaqty demeýshilik jumystar da naǵyz Atymtaı jomarttyń qolynan keletin dúnıe bolsa kerek. Búginde Áýlıeata óńirinde kópshilikke kómek qolyn sozyp, turǵyndar tilegine qulaq asyp júrgen azamattar barshylyq.
Jýyrda T.Rysqulov aýdandyq ishki saıasat bóliminiń uıymdastyrýymen aýdandyq M.О́zbekov atyndaǵy mádenıet úıinde «Jomart júrek» syılyǵynyń laýreattaryn saltanatty quttyqtaý rásimi ótti. Osy ýaqytqa deıin Jarlysý aýylyna balabaqsha, ınternat, meshit, alleıa, turǵyn úı jáne ózge de áleýmettik nysandar salyp bergen jergilikti «Sháýshen» sharýa qojalyǵynyń basshysy Saıranbaı Dónenbaev «Jyl mesenaty» atalymyna laıyq dep tanyldy.
Al Kókdónen aýylyndaǵy az qamtylǵan jáne kópbalaly otbasylaryna kómek kórsetip, sondaı-aq aýylǵa meshit salyp, sol aýyl meshitine, aýyldyq mádenıet úıine demeýshilik jasap, aýyl aqsaqaldaryn Astana jáne Almaty qalalarynyń kórikti jerlerin aralatýǵa qoldaý kórsetken Azamathan Ámirtaev «Týǵan ólke» atalymynyń ıegeri atandy.
Sonymen qatar Abaı aýylyndaǵy az qamtylǵan jáne kópbalaly otbasylardy kógildir otynmen qamtamasyz etýge óz esebinen demeýshilik jasaǵan, áleýmettik kómekke muqtaj otbasylarǵa jyl saıyn 300 myń teńge kóleminde áleýmettik kómek kórsetip kele jatqan «Súıin» sharýa qojalyǵynyń basshysy Álıhan Bármenqulov, Qoraǵaty aýylyndaǵy az qamtylǵan otbasylardyń balalaryna demeýshilik kómek kórsetip kele jatqan «Aqqaınar» sharýa qojalyǵynyń jetekshisi Sulýkúl Dálibaeva, Qulan aýylyndaǵy «Sultan» ortalyq meshitiniń salynýyna demeýshilik jasaǵan, sondaı-aq Sh.Ýálıhanov atyndaǵy shaǵyn ortalyqta orta mekteptiń áleýmettik turǵyda az qamtylǵan otbasylarynyń balalaryna turaqty kómek kórsetip kele jatqan T.Rysqulov aýdanynyń qurmetti azamaty Sábıt Sadyqov, aýdandaǵy áleýmettik az qamtylǵan otbasylaryna qaıyrymdylyq kómek berýmen aınalysyp kele jatqan «Qulan joldary» jaýapkershiligi shekteýli seriktestiginiń basshysy Qonysbaı Saǵynbekov, I jáne II top múgedekterine qaıtarymsyz kómek kórsetip kele jatqan «Tazalyq» jeke kásipkerliginiń tóraıymy Sofııa Kanarova jáne Jaqsylyq aýylyndaǵy Q.Sultanbekov atyndaǵy orta mektepke pán kabınetin jasaqtap, syıǵa tartqan Murat Báıtikov sııaqty kásipker azamattar «Júrekten júrekke» atalymymen marapattaldy.
Sondaı-aq atalǵan sharada «Jyldyń úzdik uıymy» nomınasııasyn aýdan ortalyǵy Qulan aýylyndaǵy mektepter men áleýmettik az qamtylǵan otbasylarǵa turaqty demeýshilik kórsetip júrgen «Qulan energo-jylý» mekemesi jeńip alsa, «Eren eriktilik» atalymyna múmkindigi shekteýli azamattarǵa jáne qaraýsyz qalǵan otbasy múshelerine demeýshilik kórsetip júrgen «ElAı – Qulan» qoǵamdyq birlestiginiń tóraǵasy Marlan Ádenov, al «Batyl júrek» nomınasııasyna Ábjapar aýylyndaǵy sý tasqyny kezinde aýyldastaryna azamattyq kómegin bergen azamat Álibek Ántaev laıyq dep tanyldy.
Hamıt Esaman,
«Egemen Qazaqstan»
Jambyl oblysy