T.Rysqulov aýdanynyń Qumaryq aýylynda turatyn Sháken qarııanyń búgingi tirligi jastarǵa úlgi. Jasy jetpisten asyp ketse de násibin kásipten aıyryp júrgen Sháken Japaralyuly kezinde «Karl Marks» ujymshary aspandap turǵan shaqta da sharýashylyqtyń ár salasynda jumys istep, taban aqy, mańdaı terimen mal tapty.
Keıingi jyldary qoı da baqty. Al Sháken qarııanyń sol ýaqytta aýyl shetindegi bir gektar alqapqa 400 túp alma aǵashyn otyrǵyzǵanyn, sodan ol aǵashtarǵa esekke arba jegip bóshkelep sý tasyǵanyn jurt áli kúnge deıin ańyz qylyp aıtady. Sońynan birneshe shaqyrymnan ózi aryq qazyp, sý jetkizgen. Búginde sol kóshetter jaıqala ósken alma baǵyna aınalǵan.
Tipti aǵymdaǵy jyly qarııa alma baǵynan 10 tonna ónim alyp, ol ónimderdi Taraz jáne Qyzylorda qalalarynda saýdalap qaıtypty. Al qalǵan 2 tonna ónimdi О́skemen qalasynda ótken aýyl sharýashylyǵy jármeńkesinde ótkizgen. Al Sháken qarııanyń sol qalada oqyp júrgen jambyldyq jastarǵa 45 kılogramm almany tegin úlestirip jibergeni de jomarttyqtyń belgisi.
«Eńbek er atandyrady» degen sóz bar. Aýylda turatyn naǵyz eńbek adamy búginde memleketten qaıtarymsyz qarjy alyp, qoıan asyraýmen aınalysyp otyr. Jylqy emes, qoı emes, qoıan baqqan qarııanyń bul áreketi shynynda da tańdandyrady. Áıtkenmen armany asqaq, maqsaty aıqyn Sháken Japaralyuly uly Darhannyń esimin negiz etip búginde «Darhan» sharýa qojalyǵyn qurǵan. «Shaǵyn bıznes urpaqtan-urpaqqa beriletin otbasy dástúrine aınalýy tıis» degen Elbasy sózi – meniń ómirlik ustanymym. Kózin tapqan adam qandaı kásipti bolsa da dóńgeletip alyp ketedi» deıdi qarııanyń ózi. Kezinde ózi otyrǵyzǵan alma baǵynyń janynan óz esebinen eni 10, uzyndyǵy 30 metrlik úlken qorajaı salady. Sóıtip kóktem kelisimen qoıannyń «flandr» jáne «velıkan» tuqymdaryn satyp alyp, asyraı bastaıdy.
Búginde qart kásipkerdiń qorasynda 200-den astam qoıan bar. Al qys mezgiline qaraı qoıan basyn 1000-ǵa jetkizýdi kózdegen qarııa bolashaqta olardy tipti 4000-5000-ǵa deıin jetkizip, satpaq nıette eken. Tipti ol qoıan etin saýdalaý úshin Astana jáne Almaty qalalaryndaǵy birneshe meıramhana ıelerimen de kelisip qoıypty. Endi qoıannyń etin ǵana emes, terisin de kádege jaratý maqsatynda aldaǵy kúz mezgilinde Qytaı eline barǵaly otyrǵanyn aıtty. Sháken aqsaqal Aspanasty elindegi teri óńdeý tehnologııasymen tanysyp, kerekti qurylǵylaryn alyp qaıtpaq nıette.
Tirligine tııanaqty kásipker óz sharýa qojalyǵynyń janynan úı salyp, jary Búbihan apa ekeýi sonda kóship barypty. Qazaqqa tańsyq kásipti qolǵa alǵan Sháken qarııa osynaý tirligimen-aq erinbeı eńbek etkenniń eki búıiri shyǵatynyn kórsetip otyr.
Hamıt Esaman,
«Egemen Qazaqstan»
Jambyl oblysy