Kólik reformalary aıasynda Almatynyń qoǵamdyq kólikterin jańartý jumystary jalǵasýda. Qala ákimi Baýyrjan Baıbek shalǵaıdaǵy aýdandar men qala aralyǵynda qatynaıtyn №17 jáne №62 baǵyttaǵy jańa avtobýstar parkin aralyp, negizgi jumystarymen tanysty.
Almaty qalasy ákiminiń baspasóz qyzmetiniń málimetteri boıynsha, búginde avtobýs parkinde 1560 avtobýs esepke alynǵan. Jyl aıaǵyna deıin jańa qoǵamdyq kólikterdiń úlesin 80% deıin jetkizý josparlanyp otyr.
О́tken jyly qatarǵa qosylǵan 479 avtobýstyń 80% jergilikti bıýdjetten satyp alynsa, bıylǵy jyly iske qosylatyn 569 avtobýstyń 65% jeke kompanııalardan.
Jeke tasymaldaýshylar «Dýman Trans» JShS №17 baǵyty boıynsha ISUZU markasyndaǵy 15 avtobýsty, «Oljas LTD» JShS №62 baǵytta qyzmet kórsetý uqsas markaly avtobýstardy, al «Talap T» JShS №57 baǵytty kúsheıtý úshin Yutong markaly 5 jańa avtobýs satyp alǵan.
Sońǵy kezderi tasymaldaýshy «Green Bus» kompanııasynyń atyna kóp syn aıtylýda. Tólemderdi qolma-qol jasaýmen qatar, qyzmet kórsetý deńgeıi tómen degen pikirlerdi jıi estýge bolady. Qala basshysy eger tasymaldaýshylar tıisti deńgeıde qyzmet kórsetpeıtin bolsa, onda qala tarapynan qoldaý bolmaıtyndyǵyn atap ótti. Ári qyzmet kórsetý sapasy birinshi kezekte turýy qajet, dedi. Qazirgi kezde tasymaldaýshy kompanııalardyń tolyq elektrondy bılettendirýge kóshýine oraı tabystarynyń ashyqtyǵyn qamtamasyz etip otyr. Ári tabysyn jasyrmaǵan kompanııalarǵa bankter de senimmen qaraıdy. Al bank nesıeleri bıznestiń damýyna úlken qoldaý.
Elvıra Serikqyzy,
«Egemen Qazaqstan»
ALMATY