Kezdesý barysynda Memleket basshysyna Parlamenttiń joǵary palatasynyń VI shaqyrylymy úshinshi sessııasynyń negizgi qorytyndylary men aldaǵy sessııada qarastyratyn zań jobalary jumystarynyń jospary baıandaldy.
– Aldaǵy sessııada ekonomıka salasyna qatysty aýqymdy zań jobalaryn jáne birqatar halyqaralyq qujattardy qarastyrý josparlanǵan. Úkimet kóptegen zańnamalyq bastamalar ázirlep jatyr. Bizge solarmen jumys jasaý qajet. Sonymen qatar, buǵan deıin qabyldanǵan ınfraqurylymdyq jáne ındýstrııalyq damý baǵdarlamalaryn, Prezıdenttiń bes áleýmettik bastamasyn júzege asyrý jónindegi jumystardy jalǵastyra beremiz, – dedi Nursultan Nazarbaev.
Qasym-Jomart Toqaev ótken sessııasynyń qorytyndysy boıynsha Senat depýtattary salyq, kedendik retteý, bıýdjettik basqarý jáne basqa da salalarǵa qatysty 84 zań qabyldaǵanyn málimdedi.
Qazaqstan Prezıdenti Kaspıı teńiziniń quqyqtyq mártebesin anyqtaý jónindegi Konvensııany ratıfıkasııalaýǵa baılanysty ótken Kaspıı mańy memleketteriniń Besinshi sammıtiniń nátıjelerine arnaıy toqtaldy.
– Bes memlekettiń basshylary 20 jyl boıy talqylaǵan Kaspıı teńiziniń konvensııasyna qol qoıdy. Aqtaý qalasy men Mańǵystaý oblysyn odan ári damytýǵa, óńirde jańa jumys oryndaryn ashyp, qyzmet kórsetý jáne týrızm salalaryn ilgeriletýge septigin tıgizetin bul sheshimniń zor mańyzyn búkil halyqaralyq sarapshylar atap kórsetýde, – dedi Memleket basshysy.