Bilim jáne ǵylym mınıstrligi Ulttyq ǵylymı-praktıkalyq dene tárbıesi ortalyǵynyń uıymdastyrýymen mektep jáne kolledj oqýshylary arasynda ótken Qazaqstan Respýblıkasynyń IX jazǵy Spartakıadasy óz máresine jetti.
Tórt aıdan asa ýaqytqa sozylǵan Spartakıadada 47 sport túrinen 54 jarys ótkizilip, barlyǵy 3386 medal sarapqa salyndy. Osy básekeler barysynda 520 komanda sapynda 6448 sportshy óner kórsetti. Solardyń arasynan Túrkistan oblysy ókilderiniń shoqtyǵy bıik bolyp, komandalyq eseptiń Ońtústiktiń oǵlandary bas júldeni oljalady. Almaty qalasy men Qyzylorda oblysy ekinshi jáne úshinshi oryndardy ıelense, odan keıingi satylarǵa myna óńirdiń órenderi jaıǵasty:
4. Almaty oblysy,
5. Jambyl oblysy,
6. Soltústik Qazaqstan oblysy,
7. Astana qalasy,
8. Shyǵys Qazaqstan oblysy,
9. Pavlodar oblysy,
10. Aqtóbe oblysy,
11. Qaraǵandy oblysy,
12. Mańǵystaý oblysy,
13. Batys Qazaqstan oblysy,
14. Atyraý oblysy,
15. Aqmola oblysy
16. Qostanaı oblysy.
Spartakıadanyń jabylý saltanaty Qyzylorda qalasyndaǵy «Evrazııa» sport kesheninde ótti. Bul sharaǵa Qyzylorda oblysy ákiminiń orynbasary Rýslan Rústemov, Ulttyq ǵylymı-praktıkalyq dene tárbıesi ortalyǵynyń bas dırektory, «QR Qurmetti sport qaıratkeri» Sadyq Mustafaev, mektep sport federasııasynyń prezıdenti Nurjan Nurahmetov jáne taǵy da basqa resmı tulǵalar qatysty. Olar jarys jeńimpazdary men júldegerlerin quttyqtap, osy básekelerdiń oıdaǵydaı ótýine atsalysqan uıymdastyrýshylarǵa, mektep jáne kolledj basshylaryna, oqytýshylar men jattyqtyrýshylarǵa Bilim jáne ǵylym mınıstri Erlan Saǵadıevtyń gramotasyn tabys etti.
Ǵalym SÚLEIMEN,
«Egemen Qazaqstan»