Halyqaralyq bedeldi uıym IýNESKO-nyń bastamasymen aldaǵy 2021 jyly álemde tuńǵysh ret dúnıe júzi halyqtarynyń ulttyq etnosport oıyndarynan kishi Olımpıada ótkizý týraly bastama kóterilgen edi.
Osy oıyndy ótkizýge Mádenıet jáne sport mınıstrligi ynta-yqylas tanytyp, nátıjesinde ótken shilde aıynyń basynda IýNESKO-nyń Dástúrli sport túrleri men oıyndar komıtetiniń ókilderi Halıl Ahmed Han, Shammı Rana jáne Marsellın Dellı myrzalar arnaıy saparmen elordaǵa kelgen bolatyn.
Joǵarydaǵy maqsatty sharanyń bastamashylary jaqynda Túrkııanyń Erzýrým qalasynda jalaýyn kótergen dúnıejúzilik etnosport konfederasııasynyń «Túrki oıyndary – 2018» festıvaline jınalyp, sonymen birge Ystanbul qalasynda Dúnıejúzilik etnosport konfederasııasynyń uıymdastyrýymen «Keshendi IV konsýltasııalyq keńes otyrysy» jáne «Dástúrli sport túrleri men oıyndar boıynsha dostyq toby otyrysy» atty asa mańyzdy basqosý ótkizdi.
Álemde etnosportyn damytýshy júzdegen memleket ókilderiniń basy toǵysqan atalmysh jıynǵa Mádenıet jáne sport mınıstrligi men Ulttyq sport qaýymdastyǵynyń ókilderi qatysyp, 2021 jyly ótetin álemdik etnosport oıyndaryn elimizde ótkizý týraly usynys aıtty. Usynys biraýyzdan qabyldanyp, el táýelsizdiginiń 30 jyldyq merekesimen oraılas, uly dúbir etnosport olımpıadasy elimizde ótetin boldy.
Beken QAIRATULY,
«Egemen Qazaqstan»