23 qyrkúıekten bastap «Habar» telearnasynda «Topjarǵan» mýzykalyq baıqaýy efırge shyǵady. Atalmysh shoý buǵan deıin AQSh («The Four: Battle for Stardom»), Reseı («Ýspeh») jáne ózge memleketterde kórermen tarapynan jaqsy qabyldandy. Jobany ızraıldik Armoza Formats kompanııasy jasaǵan.
«Topjarǵan» - bul juldyz bolýǵa laıyqty tórt qatysýshy birden anyqtalatyn jalǵyz mýzykalyq shoý, ıaǵnı, baıqaýdyń fınalısteri alǵashqy kezeńde belgili bolady. Alaıda budan jobanyń qyzyǵy azaımaıdy, kerisinshe fınalıster ár shyǵarylym saıyn jańadan kelgenderdiń aldynda óziniń jobaǵa laıyq ekenin dáleldeýi kerek.
Ereje boıynsha shoýǵa kelgen jańa qatysýshylar fınalısterdi jekpe-jekke shaqyryp, mýzyka alańynda kúresýge quqy bar. Al jańa qatysýshylardyń arasynan kimniń talaby joǵary ekenin qazylar sheshedi. Mýzykalyq saıystan soń zaldaǵy kórermender daýys berip, ánshilerdiń taǵdyry sheshiledi.
«Qazaqstanda ózge mýzykalyq jobalarǵa uqsamaıtyn jańa shoýdyń paıda bolǵanyn qýanyshpen habarlaımyz. Bizdiń aýdıtorııamyz qashanda jańa talanttardyń baǵyn ashatyn baǵdarlamalardy qyzyǵýshylyqpen tamashalaıdy, sondyqtan bul jobany da laıyqty baǵalaıdy jáne osy baıqaý arqyly jańa juldyzdar janady degen úmittemiz», - deıdi «Habar» Agenttiginiń Basqarma Tóraǵasy Alan Ájibaev.
Jobanyń qazylar alqasynyń quramynda Qazaqstannyń halyq ártisi Roza Rymbaeva, kompozıtor ári prodıýser Rınat Gaısın, jas repper Baller bar.
Shoýdy ánshi Kámshat Joldybaeva júrgizedi.
Baıqaýǵa qatysý úshin www.khabar.kz. saıtynda ótinimder qabyldanýda.