Parlament Senatynyń depýtattary Muratbaı Joldasbaev pen Abdaly Nuralıev jumys saparymen Jambyl oblysyna kelip, óńirdegi birqatar aýdandardyń ahýalymen tanysty.
Halyq qalaýlylary áýeli Merki aýdanyndaǵy «Merki Et» kombınatyna baryp, munda mal soıyp, et óndirip jatqan irgeli kásiporynnyń jumysyn kórdi. О́ndirgen ónimin óz elimizge ǵana emes, Iran men Bahreın elderine eksporttaıtyn kombınattyń kún saıyn 1000-1500 qoı men 250-300 iri qara malyn soıýǵa múmkindigi bar. Alaıda munda soıýǵa ákelinetin mal basy búginde azdaý bolǵandyqtan, ázirge bul múmkindik 30 paıyzǵa ǵana oryndalyp otyr eken.
Al atalǵan kombınattyń vıse-prezıdenti Sultan Álıasqarov Iran men Bahreın memleketterine ótken jyly 214 tonna et jiberilgenin, al bıylǵy jyly bul kórsetkish 360 tonnaǵa deıin artqanyn, sonymen qatar jyl sońyna deıin eksportty 1000 tonnaǵa deıin jetkizý josparda bar ekenin aıtyp ótti. Sondaı-aq, ol munda 80 adam jumys isteıtinin, jumysshylardyń ortasha aılyǵy 60 myń teńge ekenin jetkizdi.
Jumys sapary barysynda halyq qalaýlylary Merki aýdanyndaǵy «Transfer» jáne «Sypataı batyr» sharýa qojalyqtarynyń egis alqabyna bardy. On gektar jerge tátti túbir otyrǵyzǵan «Transfer» sharýa qojalyǵynyń jetekshisi Vladımır Bondarenko ótken jyly ár gektardan 700-800 sentnerge deıin ónim alǵanyn, al bıyl odan da joǵary kórsetkishke qol jetkizý úshin eńbektenip jatqanyn jetkizdi.
Al «Sypataı batyr» sharýa qojalyǵy 300 gektar jerge tehnıkalyq daqyl otyrǵyzǵan eken. Qojalyq jetekshisi Qanat Shaıhıevtiń aıtýynsha, sharýashylyq barynsha jańa tehnıkalarmen qamtylǵan. Sonymen qatar, mundaǵy qyzylsha alqaby tolyǵymen jańbyrlatyp sýarý júıesine kóshken.
Budan keıin senatorlar T.Rysqulov aýdanyndaǵy jylqy jáne iri qara maldaryn baılap, bordaqylaýmen aınalysyp otyrǵan «Súıin» sharýa qojalyǵynyń jumysymen tanysty. Atalǵan qojalyqtyń mal bordaqylaý kesheninde qazir 100-den asa mal bordaqylanýda. Keshen basshysy Álıhan Dármenqulov bordaqy maldarynyń Almaty jáne Taraz qalalarynyń bazarlarynda satylyp jatqanyn aıtty.
Sonymen qatar, munda jumys isteıtin 10 adam turaqty túrde 50 myń teńge aılyq alady. Bul rette depýtat Muratbaı Joldasbaev osyndaı tirlikti ózgelerge úlgi etý kerektigin aıtsa, depýtat Abdaly Nuralıev sońǵy jyldary elimizde memlekettik baǵdarlamalardyń arqasynda aýyl sharýashylyǵy salasy aıtarlyqtaı damyǵanyn, sondyqtan da sharýalardyń eńbegi eren ekenin jetkizdi.
Sonymen qatar, joǵarǵy palata depýtattary aýdandaǵy «Aıana» jekemenshik balabaqshasynda jáne «Sháýshen» sharýa qojalyǵynyń mal soıý, etti tońazytyp saqtaý kesheninde boldy. 2016 jyly paıdalanýǵa berilgen bul keshen 250 mıllıon teńgege salynǵan. Munda táýligine 200 qoı men 50 jylqy soıýǵa, sonymen qatar 35 tonnaǵa deıin et saqtaýǵa múmkindik bar.
Jambyl oblysyna jumys sapary kezinde senatorlar Talas aýdanynyń ortalyǵy Qarataý qalasyndaǵy «Sholaqtaý» taý-ken óńdeý kesheniniń jumysymen tanysty. Atalǵan óndiris ornynda búginde 50 adam jumys isteıdi. Sonymen qatar, halyq qalaýlylary 10 adamdy jumyspen qamtyp otyrǵan «Qarataý PRO» jaýapkershiligi shekteýli seriktestiginde boldy. Sondaı-aq, depýtattar aýdandyq ortalyq emhananyń jáne aýdandyq mýzeıdiń jumysymen tanysty.
Sapar barysynda Jýaly aýdanyna kelgen depýtattar B.Momyshuly aýylyndaǵy Datqa batyr alleıasynyń jáne aýdan ortalyǵyndaǵy «Halyqqa qyzmet kórsetý» ortalyǵynyń jumysymen tanysty. Sonymen qatar, Kókbastaý aýyldyq okrýginde ornalasqan ortaǵasyrlyq «Barkýab» qalashyǵynyń qazba jumystaryn jáne Jańatalap aýylyndaǵy «Jańatalap HHI» sharýa qojalyǵynyń jumysyn kórdi.
О́ńirdiń óndirisimen jáne ózge de salalarymen tanysqan halyq qalaýlylary Taraz qalasynda jumys saparyn qorytyndylady. Depýtattar oblys ortalyǵyndaǵy «Qazfosfat», «Alına Taraz Pro», «Ta-mak» jaýapkershiligi shekteýli seriktestiginde bolyp, óńirde atqarylyp jatqan jumystarǵa oń baǵalaryn berdi.
Hamıt Esaman,
«Egemen Qazaqstan»
Jambyl oblysy