Indonezııa astanasy Jakarta qalasynda XVIII Jazǵy Azııa oıyndary bastaldy. Oǵan sary qurlyqtyń 45 elinen kelgen saıypqyran sańlaqtar sporttyń 42 túri boıynsha synǵa túsip jatyr. Osy bir dúbirli jarysqa óz dúldúlderin qosqan eldiń biri - Mońǵolııa.
Jarystyń alǵashqy kúni osy mońǵoldyń basketbolshy qyzdarymen Gonkongtyń qyzdar quramasy jolyqty. Qyzyq bolǵanda buryn sońdy mundaı úlken dodada bıikten kórine bermeıtin mońǵolııalyq arýlar 83:79 esebimen jeti mıllıon turǵyny bar álemniń eń baı shaharynyń komandasyn jeńdi.
Bul oqıǵa Mońǵol elinde úlken sensasııaǵa telinip, komandaǵa jeńis syılaǵan sheber basketbolshy qazaq arýy Bulbul Muratqyzy týraly aqpar Mońǵoldyń aspanynda jańǵyryp tur. Ony sport súıer qaýym "Jakartada janǵan juldyz" dep baǵalaýda. Bulbul sheńberge dopty alystan 8 ret dál túsirip, ózge de áreketterimen komandasyna 37 upaı alyp bergen. Bul jeke oıynshy úshin úlken jetistik.
Bulbul qaryndasymyz 1995 jyly 11 qarashada Ulan-batyr irgesindegi Nalaıqy kentinde dúnıege kelgen. Boıy - 165 sm, salmaǵy - 58 kılo. Basketbolmen aınalysqanyna onshaqty jyldyń júzi bopty. Buǵan deıin birneshe halyqaralyq jarystarda top jaryp, 2016 jyly qurlyqtyq stýdentter lıgasynyń qola medal ıegeri atanǵan.
Aqpar úshin aıta keteıik. Atalmysh jarysqa Bulbuldan basqa kórshi Qytaı Respýblıkasynyń atynan taǵy úsh qandasymyz qatysyp jatyr. Olardyń biri - 65 kılo salmaqta beldesetin erkin kúres sheberi Erlanbek Káteıuly bolsa, ekinshisi - Ýálıhan Serikuly. Bul jigit grek-rım kúresinen 60 kılo salmaqta óner kórsetedi. Úshinshi qandasymyz boksshy Toqtarbek Tańatqanuly. Bul azamat 75 kelige deıingi salmaq dárejesinde saıysady.
Beken QAIRATULY,
"Egemen Qazaqstan"
Sýrette Bulbul Muratqyzy