Zerendidegi respýblıkalyq jazǵy jastar bilim berý lageriniń jumysy jaıly oqyrmandardy qulaǵdar etkenbiz. Mazmuny tereń mándi is jalǵasyn tabýda.
Jas tolqynnyń el erteńi ekendigi álmısaqtan belgili. Búgin qoǵamdy mazalap otyrǵan mańyzdy másele sol jastarymyzdyń rýhanı jan dúnıesi, bilimi men biligi, kózqarasy men kóńil kókjıegi qandaı deńgeıde bolýy kerek. Zymyraǵan júırik zamannyń jetegine ilesip kóshten qalmaıtyn, kópten ozatyn bir shoǵyr bilimdi jastar óz ónegelerimen, qol jetkizgen tabystarymen qurbylarynyń kózaıymyna aınalyp, ádemi mysal bolsynshy-aq deısiń. «Zeren» demalys ortalyǵyndaǵy respýblıkalyq jastardyń jazǵy bilim lageriniń ekinshi maýsymy ótkizilýde. Oǵan jastar uıymdarynyń kóshbasyshalary, jastar resýrstyq ortalyqtarynyń mamandary, kásipkerler men «Qazaqstannyń 100 jańa esimi» jobasynyń jeńimpazdary qatysýda.
Osy jastar aldynda Qazaqstan Respýblıkasy Prezıdent Ákimshiligi Ishki saıasat bóliminiń meńgerýshisi Aıda Balaeva memleket pen qoǵam aldynda turǵan asqaraly mindetterdi saralaı kele, sol mindetterdi sheshýge jastardyń da bilek sybana at salysý qajettigine toqtaldy. Árbir baǵdarlamanyń ózindik ereksheligi men tıimdiligi týraly tereńnen qozǵap túsindirip berdi. Sonyń ishinde ásirese, Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyna kóp toqtaldy. Tórtkúl dúnıeni tegis sharpyǵan básekege qabilettilikke biz qalaı qol jetkizemiz. О́risi keńeıgen órkenıetti eldermen ıyq tirestirý úshin ne isteýimiz kerek? Osynaý saýaldar jalǵyz moderatorlardy ǵana emes, jınalǵan jastardy da tolǵandyryp júrgendigin anyq baıqaýǵa bolady. Sheshenniń sózin muqııat tyńdaǵan olar óz kóńilderindegi saýaldarǵa tushymdy jaýap aldy.
Jastarmen birge bir sabaǵyna biz de qatystyq. Jastar aldynda sóz sóılegen belgili saıasatker Aıdos Syrym men «Qazaqparat» HAA bas dırektory Asqar Omarov el men jer, til tárizdi qundylyqtar týraly oı tolǵady. Qysqa qaıyryp aıtqanda, uzyn-yrǵasy bes kúnge josparlanǵan bilim lageriniń jas tolqynǵa bereri besbatpan.
Baıqal BAIÁDIL,
«Egemen Qazaqstan»
Aqmola oblysy, Zerendi aýdany.