Astanada matematıka men tildi tereń meńgerýge arnalǵan mektep ashyldy

Elorda turǵyndarynyń sany jyl saıyn artyp keledi. Oǵan týý kórsetkishi men ishki kóshi-qonnyń artýy áser etip otyrǵany anyq. Resmı derekterge súıensek, bas qalada  ár oqý maýsymy saıyn mektepke baratyn balalardyń sany  10-15 myńǵa artyp otyrady. 2010-2011 jyldary Astana mektepterinde 74 myń bala oqysa, ótken jyly 145 myń oqýshy bilim alǵan. Osyǵan baılanysty el astanasynda shaǵyn mektepterdiń de qatary kóbeıip keledi. Bul birinshiden, balalardyń sapaly bilim alýyna múmkindik týdyrsa, ekinshiden ustazdardyń júgin jeńildetýge jol ashady. 

«SEED School» matematı­ka­lyq-tildik mektebinde 1-4-sy­nyp oqýshylary qazaq jáne orys toptaryna bólinip bi­lim alady. Onda matematıka jáne qazaq, aǵylshyn tilderi te­reń­­de­tip oqytylyp, robotty teh­nı­ka, radıotehnıka jáne ınfor­­matıkadaǵy jańa tehno­lo­­gııalar da egjeı-tegjeıli úı­re­ti­ledi. Oqýshylar túske deı­in negizgi pánder boıynsha sa­baq alsa, tústen keıin mektep uıym­­dastyrǵan 12 úıir­mege qa­tysady. Onyń ishinde ba­­la­lardyń memlekettik tildi jetik meńgerýi úshin uıym­das­ty­rylǵan qazaq tilin­degi drama úıir­mesi jáne aǵyl­shyn tilinde júretin  jýrnalıs­tıka úıirmesi bar.

«Bizdiń shaǵyn mektebimizde matematıka jáne qazaq, aǵyl­shyn tilderi tereńdetip oqyty­lady. Budan bólek 12 úıirme men fakýltatıvti sabaqtar júr­giziledi. Balalar tańǵy 8.00-den 18.00-ge deıin osynda bolady. Mekteptiń óz ashanasy bar, oqýshylar 3 mezgil tamaq­­tanady», deıdi «SEED School» mek­tebiniń oqý isi jónin­de­gi meńgerýshisi Bıbigúl Nurymǵalıeva.

75 oryndyq shaǵyn mektep­tiń taǵy bir ereksheligi – ár sy­nypqa 16 baladan artyq oqý­shy qabyldanbaıdy. Jańa mekteptiń ashylý saltanatyna qatysyp, quttyqtaý sóz sóılegen «Daryn» respýblıkalyq ǵylymı-tá­jirıbelik ortaly­ǵynyń dırektory Sholpan Qırabaeva elordada shaǵyn mektepter men balabaqshalardyń óte qajet ekenin aıtyp, osyndaı bilim ortalyqtarynyń kóbeıýi bilim sapasyn arttyrýǵa kómektesetinin jetkizdi.

Bilim ordasyna jumysqa shaqyrylǵan qyzmetkerlerdiń barlyǵy jańartylǵan oqý baǵdarlamasy kýrsynan ótken birinshi kategorııaly ustazdar ekenin aıtqan mektep dırektory Gúlsim Egizbaeva sabaq halyqaralyq ádisnamamen úsh tilde júrgiziletinin atap ótti.

Aıta keteıik, SEED – izde­ný, zertteý, eksperıment jasaý jáne jańalyq ashýǵa negiz­delgen oqý júıesi. Bul júıe ba­lalardyń alǵan bilimin teorııa­lyq jáne praktıkalyq turǵyda meńgerýine múmkindik beredi.

Maıgúl SULTAN,

«Egemen Qazaqstan»