«Kazakh Tourism UK» aksıonerlik qoǵamy Astana qalasynyń 20 jyldyq mereıtoıyna oraı el aýmaǵyndaǵy eń bıik 20 shyńǵa arnaıy ekspedısııa uıymdastyrýdy kózdep otyr.
Osyǵan oraı Almatydaǵy «Dostyq» úıinde baspasóz máslıhaty uıymdastyryldy. Bul sharaǵa Almaty qalasyndaǵy «Visit Almaty» týrıstik aqparattyq ortalyǵynyń dırektory Kámılıa Luqpanova, alpınızmnen Qazaqstan qurama komandasynyń múshesi, týrıstik kópsaıystan halyqaralyq jarystardyń júldegeri Eldar Ǵabbasov, alpınızm boıynsha bilikti bapker Artem Skopın, sporttyq týrızm qaýymdastyǵynyń prezıdenti Arman Hasenov jáne Qaraǵandy oblystyq quzǵa shyǵý federasııasynyń tóraǵasy Aıdos Jomartov qatysty.
Ekspedısııaǵa quramynda kásibı alpınıster men tájirıbeli saıahatshylar, tanymal jýrnalıster men blogerler bar 100-den asa adam qatysady. Olar Almaty, Túrkistan, Shyǵys Qazaqstan oblystary aýmaǵyndaǵy taýly aımaqtarmen júrip ótpek. Ondaǵy maqsat – Qazaqstannyń taýly óńirlerinde belsendi týrızmdi damytýǵa qolaıly jaǵdaıdyń bar ekenine óz otandastarymyzdyń jáne kúlli álem jurtshylyǵynyń kózin jetkizý.
– Ekspedısııa josparyn jasaý barysynda «Qazaqtýrızmmen» aqyldasa otyryp, elimizdiń úsh óńirinde ornalasqan 20 shyńǵa tańdaýymyz tústi. Ol jerlerde ekstremaldy jáne ekotýrızmdi damytýǵa múmkindik mol. Biz osy baǵyttardyń barlyǵyn tereń zerttep, olardyń ınfraqurylymyn damytýdyń joldaryn usynamyz. Osy jospardy oıdaǵydaı júzege asyrý úshin Qazaqstan Respýblıkasy Alpınızm jáne quzǵa shyǵý federasııasy, Sporttyq týrızm federasııasy jáne jergilikti aýmaqtyq qaýymdastyqtar quramyndaǵy kásibı alpınıster men mamandardy osy iske jumyldyrdyq. Sonymen qatar, Astananyń mereıtoıyna oraı ózindik syı daıyndap otyrǵan jaıymyz bar: Túrkistan oblysyndaǵy Saıran-О́gem Ulttyq saıabaǵyndaǵy shyńdy «Astananyń 20 jyldyq shyńy» dep ataýdy josparlap otyrmyz, – deıdi Arman Hasenov.
Ǵalym SÚLEIMEN,
«Egemen Qazaqstan»
ALMATY