Almaty qalasyndaǵy qarqynmen júrip jatqan qurylystardyń bir bóligin stýdentterdiń turǵyn-jaılary qamtıdy. Búginde joǵary oqý oryndarynyń basym kópshiligi shoǵyrlanǵan ońtústik astanada 22 myńdaı stýdent jataqhanaǵa muqtaj.
Qala basshysy Baýyrjan Báıbek jumys sapary aıasynda aıaqtalýǵa jaqyn jataqhanalar qurylysymen tanysty. Stýdentterdi jataqhanamen tolyqqandy qamtamasyz etý úshin sońǵy úsh jylda 37 jataqhana salý josparlanyp otyr. Qala ákimdiginiń Baspasóz qyzmetiniń málimeti boıynsha, bıylǵy jyly qoldanysqa tórt jataqhana beriledi. Al 12 joǵarǵy oqý ornynda 4,8 myń oryndyq jataqhana qurylysy úshin arnaı ýchaskeler anyqtalǵan. Sondaı-aq, qalada 19 jataqhana salý úshin jer telimderi berilip otyr.
Baýyrjan Baıbek jumys sapary barysynda Bostandyq aýdanynda salynǵan 400 oryndyq alty qabatty jańa jataqhanany aralady. Búgingi kúni munda turǵyn jáne turmystyq bólmelerdi jıhazben jabdyqtaý jumystary júrgizilýde. Qazaqstan ınjenerlik-tehnologııalyq ýnıversıteti qala syrtyndaǵy stýdentterge arnalǵan turǵyn úıge qajettiniń barlyǵyn tolyǵymen qamtamasyz etetin bolady.
Asfendııarov atyndaǵy QazUMÝ janyndaǵy 600 oryndyq toǵyz qabatty jataqhana qurylysy da aıaqtalýǵa jaqyn. Qazirgi ýaqytta alańy 11 myń sharshy bolatyn ǵımarattyń ishki árleý jáne kóriktendirý jumystary júrgizilýde.
Almatyda sonymen qatar «Almaty jastary» baǵdarlamasy jalǵasyn tabýda. Jas otbasylarǵa jeke turǵyn úı satyp alýǵa múmkindik berý maqsatynda bastapqy tólemsiz 5% mólsherimen 2 mlrd. teńge qarastyrylǵan.
Sońǵy jyldary Almatyda turǵyn úı qurylysynyń qarqyny 4 esege ósip, kezekte turǵan árbir úshinshi turǵyn páterge ıe bolǵan. Al jýyq arada 17 myńnan asa páterler salynatyn bolady.
Elvıra Serikqyzy,
«Egemen Qazaqstan»
ALMATY