Búgin Qyzylordada ótken «О́zińe sene basta» kórme-baıqaýynda Jańaqorǵan aýdanynyń turǵyny Oral Qasıet Qaldybaıqyzy jeńimpaz atandy. Bul shara múmkindigi shekteýli kásipkerler úshin Qyzylorda oblysynda jappaı kásipkerlikti damytýdyń úsh jyldyǵy (2018 - 2020 jj.) aıasynda uıymdastyrylyp otyr.
Kásipkerler úıinde oblystyq «О́zińe sene basta» atty múmkindigi shekteýli kásipkerlerdiń ónimderinen oblystyq kórme-baıqaýy ótti. Sharaǵa ártúrli salada kásipkerlikpen aınalysyp júrgen barlyǵy 50 adam qatysty.
Baıqaý barysynda qatysýshylardyń aǵash, toqyma, sýret, taǵam men kóptegen basqa da ónimderinen kórme uıymdastyryldy. Oblys ákimi Qyrymbek Kósherbaev sharaǵa qatysyp, baıqaý jeńimpazdary men qatysýshylaryn marapattady.
«Jumyspen qamtý kez kelgen memleket úshin qashanda ózekti máselelerdiń biri bolyp tabylady. Al azamattardy jumyspen qamtýdyń balamasy ol - kásipkerlik. Búgin múmkindigi shekteýli kásipkerlerdi qoldaý ári olardyń damýyna jol ashý maqsatynda «О́zińe sene basta» kórme-baıqaýyn ótkizip otyrmyz.Qatysýshylar - taǵdyr taýqymetine qaramastan, qoǵamda óz ornyn taýyp, ózin jumyspen qamtyp, tipti ózgelerge jumys taýyp bergen azamattar. Olar kópke úlgi bolýǵa laıyqty jáne qoǵamdy masyldyq kózqarastan aryltýǵa septigin tıgizedi»,- dedi aımaq basshysy.
Baıqaý jeńimpazdaryn oblystyq máslıhat depýtattary, «Nur Otan» partııasy oblystyq fılıalynyń ókilderi, kásipkerler palatasynyń músheleri, «Damý» qory men áleýmettik qorǵaý uıymy qyzmetkerlerinen qurylǵan komıssııa anyqtady.
Sonymen, baıqaýdyń jeńimpazy «Kádesyı jasaý jobasymen Jańaqorǵan aýdanynan qatysqan Qasıet Oral oblys ákiminiń alǵys haty men 1 mıllıon teńgege ıe boldy. Ekinshi oryn ıegeri, «Aıaqkıim jasaý» jobasymen Qarmaqshy aýdanynan qatysqan Erlibek Jarmahanov 700 myń teńgemen, úshinshi oryn ıegeri «Káriz júıeleri ónimi, temir jáne sýret buıymdary» jobasymen Qyzylorda qalasynan qatysqan Aslan Ertohaev 500 myń teńge syıaqymen marapattaldy. Sonymen qatar, baıqaýdyń barlyq 50 qatysýshysy da gramota men turmystyq tehnıkalyq taýarlar sertıfıkatyna ıe boldy.
«Birneshe jyl buryn jaqyndarymnyń kómegimen kádesyı jasaýmen aınalysa bastadym jáne kásipkerlikti qoldaýǵa baǵyttalǵan túrli memlekettik baǵdarlamalarda úzdik nátıjelerge qol jetkizdim. Baıqaýda jeńimpaz atanǵanyma óte qýanyshtymyn, uıymdastyrýshylarǵa osyndaı baıqaý ótkizgeni úshin jáne qoldaý kórsetken jandarǵa alǵys bildiremin. Mundaı sharalar óz kásipterin damytý úshin óte qajet dep esepteımin», - deıdi mıllıonnyń ıegeri Qasıet Oral.
Atap óteıik, qazirgi tańda oblysta múmkindigi shekteýli 29353 adam tirkelgen. Onyń ishinde I toptaǵy múgedekterdiń sany – 2827, II toptaǵy – 11145, III toptaǵy – 10526 bolsa, al 18 jasqa deıingi balalardyń sany – 4855-ti quraıdy.
2018 jyldyń birinshi jartyjyldyǵynda jumyspen qamtý ortalyǵy arqyly 376 múmkindigi shekteýli adamdy jalpy jumys oryndarymen, onyń ishinde 148 múgedek jandy turaqty jumys oryndarymen qamtyp otyr. 2012 jyldan bastap óńirimizde «Invataksı» qyzmeti uıymdastyrylǵan. Bastapqyda ınvataksı tek 2 bolsa, búgingi kúni olardyń sany 18-ge jetti. Arbadaǵy azamattardy tasymaldaýǵa arnalǵan appareli bar arnaıy baspaldaqpen jabdyqtalǵan 112 avtobýs qyzmet kórsetýde. Sonymen qatar, memlekettik baǵdarlamalar aıasynda kásipkerlikpen aınalysýdy qalaǵan múmkindigi shekteýli qyzylordalyqtar ár salada óz isterin kedergisiz bastaý úshin jan-jaqty kómek ala alady.