Jarystyń alǵashqy kúninde semserlesý sportynyń ókili Dmıtrıı Aleksanın Qazaqstannyń alǵashqy altyn medalin áperse, jankúıerler ekinshi altyndy tórt kún kútýge týra keldi. Keshegi jarys kúni Qazaqstan úshin qola júldemen bastalǵanymen, velosporttan toptyq jarys kezeńinde otandasymyz Alekseı Lýsenko Azııa oıyndarynyń chempıony atandy. Alekseı Lýsenko eki japondyq jáne eki taılandtyq velosportshynyń kórsetken qysymyna qaramastan, máre syzyǵyn birinshi bolyp kesti. Lýsenkonyń ýaqyt kórsetkishi - 3:25:25.
Sársenbi kúni júlde alýy múmkin bolǵan kúres túrlerinen saıystar aıaqtalyp, altyn alǵan balýandardyń esimderi anyqtaldy. О́zderin áıgili apaıtós balýan Qajymuqannyń izbasarymyz dep sanaıtyn bizdiń balýandardyń esimin bul tizimen kóre almaǵanymyz ókinishti-aq. Azııa oıyndarynyń tarıhynda qazaq balýandary tuńǵysh ret altyn júldesiz elge oralatyn boldy.
Azııa oıyndarynyń eki dúrkin chempıony Nurmahan Tinálıevke jankúıerlerdiń senimi zor edi, biraq úsh dúrkin jeńimpaz atanatyn múmkindik týǵan sátte ýystaǵy altyndy sýsytyp aldy. Fınaldyq saıysta aıqyn basymdylyqty ózbek balýanyna berip, oısyraı utylǵany tipti uıat. Almat Kebisbaevtan da altyn medal kútip edik. Degenmen, qarsylasy eki dúrkin álem chempıony ekenin eskersek, jeńiske jetýi qıyn ekenin kóziqaraqty kórermen beldesý aldynda-aq sezgendeı. Koreı balýany osy jeńisinen keıin eki dúrkin Azıada jeńimpazy atandy. Danııar Qaısanovqa qaısarlyq jetispegenin nesine jasyraıyq. Bekzat Ábdirahmanovtyń osydan tórt jyl buryn Azıadada jeńiske jetkeni áli esimizde. 74 kıloda tájirıbeli balýandy utýǵa taktıkalyq turǵyda daıyndyq jetispedi. 1994 jyly Máýlen Mamyrov alǵan altynnyń qataryn tolyqtyratyn erkin kúres sheberleriniń qarasy ázirge baıqalmaı tur.
Qola alǵan jigitterge de myń alǵys. Degenmen, bir beldesýde jeńilip, jubanysh beldesýinde jeńip, medal alý olardyń myqtylyǵyn kórsetpeıdi. Endigi bar úmit – jeńil atletter men boksshylarda. Bylǵary qolǵap sheberleri irikteý jarysty búgin bastasa, atletter erteńnen bastap jarys jolyna shyǵady.
Azııa oıyndarynyń besinshi kúni de qoladan kende qalmadyq. Alǵashqy qola júldeni akademııalyq esýden qyzdar arasyndaǵy jekeleı synda Aleksandra Opachanova jeńip alsa, stend atýdan Marııa Dmıtrıenko da qola júlde ıelendi. Sonymen qatar taekvondodan 68 kılo salmaqta synǵa túsken Erasyl Qaıyrbek jartylaı fınalda eki dúrkin Olımpııa oıyndarynyń júldegeri, eki dúrkin Azııa oıyndarynyń chempıony ońtústikkoreıalyq sportshydan 10:32 esebimen jeńilip, qola júldeni qanaǵat tutty. El qorjynyna taǵy bir qola júldeni 50 metrge batterflıaı ádisimen júzýde Ádilbek Mýsın saldy.
Álı BITО́RE, «Egemen Qazaqstan»