Astanaǵa Túrik Respýblıkasy Jandarmerııasynyń bas qolbasshysy, armııa generaly Arıf Chetınniń basshylyǵymen arnaıy delegasııa resmı saparmen keldi. Úsh kúnge sozylǵan sapar aıasynda Qazaqstan men Túrkııa arasyndaǵy salalyq vedomstvolardyń ózara yntymaqtastyǵyn tereńdetý jaıy talqylandy.
Al delegasııa quramynda Túrkııanyń Qazaqstandaǵy elshiligindegi áskerı attashesi, polkovnık Jıýneıt Gıýmen, Túrik Respýblıkasy Jandarmerııasynyń baılanys jáne aqparattyq júıeler basqarmasynyń bastyǵy general-maıor Engın Chyraqoǵly men Azııa aımaǵy boıynsha áriptestik jónindegi bólim basshysy maıor Jengız Iylmaz da boldy.
Áriptestik kezdesýdiń alǵashqy kúninde áskerı qonaqtar Qazaqstan Respýblıkasy Ulttyq ulanynyń Bas qolbasshylyǵynda bolyp, quqyqtyq áskerdiń qurylý tarıhymen, onyń maqsat-mindeti jáne qurylymdyq ereksheligimen tanysty.
Sondaı-aq delegasııa basshysy armııa generaly Arıf Chetınniń Qazaqstan Respýblıkasy Ulttyq ulanynyń bas qolbasshysy general-leıtenant Rýslan Jaqsylyqovpen kezdesýi barysynda Túrkııanyń áskerı-oqý oryndarynda maman daıarlaý baǵyty men bilim berý isindegi áriptestikti damytýdyń jaı-kúıi talqylandy. Sonymen qatar osy jyldyń shilde aıynda qazaqstandyq delegasııanyń Ystanbulda ótken saparynda kelisilgen birqatar jetistikter legin odan ári jalǵastyrý jóninde áńgime órbidi.
Esterińizge sala keter bolsaq, atalǵan sapar aıasynda ekijaqty áriptestik aıasynda Qazaqstan Respýblıkasy tarapynyń Túrkııanyń Jandarmerııa ýchılıshesinde bilim alýshy kýrsanttaryn jyl saıyn 8 adamǵa deıin kóbeıtý kelisimi jasalǵan edi. Oǵan qosa, taraptar Túrkııanyń áskerı-oqý oryndarynan túlep shyqqan qazaqstandyq túlekterdiń odan ári Túrik Respýblıkasynyń akademııasynda jáne Túrkııa oqý oryndaryndaǵy arnaıy maqsattaǵy bólimshelerde áskerı mamandardy daıarlaý úshin (surmergender men jarylǵysh qarý mamandaryn, sýda júzý mamandaryn, t.b.) oqý kýrstaryn uzartý jóninde kelisim jasalǵan bolatyn.
Delegasııa ókilderiniń resmı kezdesýi sońynda armııa generaly Arıf Chetın Qazaqstan Respýblıkasy Ulttyq ulany Bas qolbasshylyǵy ǵımaratynyń aýmaǵynda «Dostyq alleıasyn» ashyp, onda alǵashqy aǵashty otyrǵyzdy.
Sodan keıingi resmı sapar Tuńǵysh Prezıdent – Elbasy atyndaǵy Ulttyq qorǵanys ýnıversıtetinde jalǵasty. Munda qonaqtar ýnıversıtettiń oqý-ádistemelik bazasy men materıaldyq áleýetimen tanysyp, mýzeıdi aralady. Sonymen qatar ımıtasııalyq modeldeý ortalyǵy men Qazaqstan Qarýly Kúshteri Bas shtaby akademııasy men Ulttyq ulannyń biliktilikti arttyrý fakýltetiniń jumysymen tanysty.
Resmı sapardyń ekinshi kúninde Qazaqstan Respýblıkasynyń Ishki ister mınıstri general-polkovnık Qalmuhanbet Qasymovtyń Arıf Chetınmen kezdesýi ótip, onda yntymaqtastyqty tereńdetý men belsendi júrgizýge yqylas tanytyldy. Sonymen qatar quqyq qorǵaý salasyndaǵy qarym-qatynas deńgeıiniń bolashaqtaǵy baǵyt-baǵdary naqtylandy.
Odan ári túrkııalyq áskerıler Arnaıy jedel maqsattaǵy astanalyq brıgadanyń materıaldyq-tehnıkalyq jaǵdaıymen, áskerılerdiń turmysymen tanysyp, áskerı qarý-jaraq kórmesin tamashalady. Delegasııa ókilderi sapardyń sońǵy túıini retinde elordadaǵy Mustafa Kemal Atatúrik atyndaǵy saıabaqqa baryp, eskertkishke gúl shoqtaryn qoıdy.
«Egemen-aqparat»