Fýtzaldan Almatyda ótip jatqan stýdentter arasyndaǵy álem birinshiliginde Qazaqstannyń erler quramasy shırek fınalda Argentına quramasyn 6:2 esebimen oısyrata utyp, jartylaı fınalǵa joldama aldy.
Qazaqstannyń fýtzalshylary jartylaı fınalda Portýgalııamen kezdesedi «Almaty Arenada» ótken bul báseke basynan aıaǵyna deıin jerlesterimizdiń basymdyǵymen ótti. Oıynnyń 6 mınýtynda Vladıslav Chernomordov esep ashsa, arada úsh mınýt ótkennen soń argentınalyq Dı Rıka tarazy basyn teńestirdi. Desek te qonaqtardyń qýanyshy uzaqqa sozylǵan joq. Úziliske deıin Qazaqstan quramasy taǵy eki gol soǵyp úlgerdi. Bul goldyń avtorlary – Ulan Jaqsylyqov pen Birjan Orazov. Al ekinshi taımda Ersultan Saǵyndyqov, Arnold Knaýb jáne Asyljan Alın mergendik tanytsa, argentınalyqtar oǵan bir ǵana doppen jaýap qaıyra aldy. Esep – 6:2.
Búgin saǵat 20:00-de ótetin jartylaı fınaldyq saıysta Qazaqstannyń fýtzalshylary Portýgalııa quramasymen kúsh synasady. Bul óte myqty komanda. Tarıhqa júginsek, Pıreneı túbeginiń túlekteri stýdentter arasyndaǵy álem birinshiliginde eki márte jeńis tuǵyryna kóterilgen eken. 2008 jyly Slovenııada ótken jarysta olar bas júldeni oljalasa, 2012 jyly óz elinde ótken básekeni qola medalmen qorytyndylady. Sondaı-aq, portýgalııalyqtar taǵy úsh márte tórtinshi orynǵa taban tiredi. Almatyda ótip jatqan dop dodasynyń shırek fınalynda aıtýly komanda Taıland quramasyn 7:2 esebimen utty. Al kelesi jartylaı fınaldyq saıysta Reseı men Ýkraına kezdesedi.
Ǵalym SÚLEIMEN,
«Egemen Qazaqstan»
ALMATY