Parlament Májilisi Tóraǵasynyń orynbasary, «Nur Otan» partııasy fraksııasynyń jetekshisi Gúlmıra Isımbaeva bastaǵan depýtattar toby atap aıtsaq, S. Seıdýmanov, S. Bychkova, G. Iksanova Almaty qalasyna jumys sapary barysynda «Belsendi uzaq ómir súrý ortalyǵy» qoǵamdyq qoryna bardy.
Onda halyq qalaýlylary zeınetkerler men qart adamdardyń ómir súrý sapasyn jaqsartýǵa baǵyttalǵan qor jumysymen tanysyp, ortalyqqa kelgen qazynaly qarttarmen pikir almasty.
G. Isımbaeva zeınetkerlerge Elbasymyzdyń bes áleýmettik bastamasy, sondaı-aq, basqa da memlekettik mańyzdy baǵdarlamalar týraly jáne olardy zańnamalyq turǵydan qamtamasyz etý jolynda atqaralyp jatqan jumystar týraly áńgimeledi.
О́z sózinde Májilis Tóraǵasynyń orynbasary aǵa býynnyń mol bilimi men baı tájirıbesi óskeleń urpaq úshin árqashanda úlgi-ónege ekenin aıryqsha atap ótti.
Aıta keteıik, atalǵan qor 2017 jyly 12 mamyrda 2002 jylǵy qartaıý problemasy jónindegi Madrıd halyqaralyq is-qımyl josparyna jáne Qazaqstan Respýblıkasynyń memlekettik áleýmettik saıasatyna sáıkes qurylǵan.
Qazirgi ýaqytta «Belsendi uzaq ómir súrý» ortalyǵynyń bazasynda 1757 adam tirkeldi, olar kez kelgen ýaqytta bas qosyp, pikir almasyp, zańger, psıholog, dárigerlerden ózderin mazalaǵan suraqtaryna jaýap ala alady. Ortalyqta aqsaqaldar klýby, kompıýterlik synyp, dene shynyqtyrý bólmeleri bar.
Qor qyzmetkerleri zeınetkerler men qarttarǵa, baqytty jáne tolyqqandy ómir súrýge jaǵdaı jasaý úshin, atap aıtqanda, turǵyn úı, kómek kórsetý, kútim jasaý sııaqty máselelerdi tıimdi sheshýdiń barlyq múmkindikterin qarastyrady.
Osy kúni depýtattar jeńil dárejeli kognıtıvtik buzylystary bar qarttarǵa, zeınetkerlik jasqa jetken tulǵalarǵa jattyǵý men qalpyna keltirýge arnalǵan kúndizgi qyzmet ortalyǵyna bardy.
Onda áleýmettik-medısınalyq, áleýmettik-psıhologııalyq, áleýmettik-eńbek, áleýmettik-mádenı, áleýmettik-quqyqtyq basqa da qyzmetter túri usynylady.