Memleket basshysy Halyqaralyq Araldy qutqarý qorynyń quryltaıshy memleketteriniń basshylary otyrysynyń qorytyndysy boıynsha birlesken baspasóz máslıhatyn ótkizdi, dep habarlaıdy Aqordanyń baspasóz qyzmeti.
Qazaqstan Prezıdenti jýrnalıster men resmı delegasııalar músheleriniń aldynda sóılegen sózinde Túrikmenstan Prezıdentine dástúrli qonaqjaılyq kórsetkeni úshin rızashylyq bildirip, sammıttiń joǵary deńgeıde uıymdastyrylǵanyn atap ótti.
– Bul kezdesýimizdiń álemniń barsha musylman qaýymy úshin qasıetti Qurban aıt merekesinen keıin ótkizilýiniń sımvoldyq máni zor. Osy múmkindikti paıdalana otyryp, baýyrlas halyqtarǵa baq-bereke, beıbit ómir, amandyq tileımin, – dedi Nursultan Nazarbaev.
Memleket basshysy Aral daǵdarysy adamzat tarıhyndaǵy eń iri ekologııalyq apattardyń biri bolyp sanalatynyn atap ótip, 50 jyl ishinde teńizdiń aýmaǵy 9 ese kemip, sý kólemi 30 ese azaıǵanyn aıtty.
– Jyl saıyn Aral teńiziniń keýip qalǵan ultanynan jelmen birge 80 mıllıon tonna ýly tuz kóteriledi. Bul tuz shańdy daýylmen Batys Eýropadan Gımalaıdyń shyńdaryna deıin myńdaǵan shaqyrymǵa taralyp, adamdardyń densaýlyǵyna jáne elderimizdiń ekologııalyq júıesine zardabyn tıgizýde, – dedi Memleket basshysy.
Nursultan Nazarbaev Aral aımaǵynyń ekologııalyq jaǵdaıyn jaqsartýǵa baǵyttalǵan Halyqaralyq Araldy qorǵaý qorynyń quryltaıshy memleketteriniń kúsh-jigerin qoldaý úshin taraptardyń osy problemamen aınalysatyn dúnıejúzilik qoǵamdastyqqa, Birikken Ulttar Uıymyna, barlyq Qorlar men bankterge júgingeni jón dep tapqanyn atap ótti.
– Biz óz tarapymyzdan Qordyń jumysyn jetildirýge ýaǵdalastyq. Barlyq máselelerdi, sonyń ishinde eskirgen sheshimderdi, sondaı-aq Qordyń barlyq basqarýshy jáne atqarýshy organdarynyń qyzmetin taldaý máselesin shaǵyn quramda ashyq talqyladyq, – dedi Qazaqstan Prezıdenti.
Memleket basshysy sý shyǵynyn 50-60 paıyzǵa qysqartyp, ónimdilikti 4-5 ese arttyratyn tamshylatyp sýarý sııaqty zamanaýı tehnologııanyń jáne sýarýǵa qoldanylatyn sýdy únemdi paıdalanýdyń mańyzdylyǵyn atap ótti.
– Zamanaýı ǵylymı ustanymdarǵa negizdelgen óte mańyzdy usynystar boldy. Mysaly, ekologııalyq jaǵdaıdy jaqsartýǵa septigin tıgizetin ári aýyl sharýashylyǵynda malǵa jem daıyndaýdyń kózi bola alatyn, sondaı-aq tuzdyń kóterilýin boldyrmaıtyn, tuzǵa tózimdi jasyl kóshetter otyrǵyzý máselesi aıtyldy, – dedi Nursultan Nazarbaev.
Qazaqstan Prezıdenti usynystardyń bári sammıttiń kommıýnıkesinde bekitilgenine toqtalyp, túrikmen tarapy barlyq usynystardy jınaqtaıtynyn, al atqarýshy komıtet aldaǵy is-qımyldardyń naqty josparyn ázirleıtinin atap ótti.
Jıyn sońynda Memleket basshysy taraptardyń sý sharýashylyǵy, óńirdiń sý-energetıkalyq jáne ekologııalyq aspektileri jónindegi ustanymdaryn jaqyndastyrý máselelerin egjeı-tegjeıli talqylaǵanyn atap ótip, Qazaqstan ótken kelissózderdiń nátıjelerin joǵary baǵalaıtynyn aıtty.