QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen «Tún qudaıy» fılmi Sahalın Halyqaralyq «Jerdiń qıyry»(«Kraı sveta») kınofestıvaliniń baıqaýdan tys «Kórshiler/Dostar» atty baǵdarlamasynda kórsetiledi. Festıval Ońtústik-Sahalınde tamyzdyń 24 men 31 aralyǵynda Sahalın gýbernatorynyń qoldaýymen ótedi.
Kınofestıval uıymdastyrýshylary: «jer túbinde shyqqan úlken kıno áleminiń jańǵyryǵy» jáne «Batystyń qoıǵan saýalyna Shyǵystyń qaıtarǵan jaýaby» dep baǵamdaıdy ózderin. «Tún qudaıynan» bólek «Jer qıyrynyń» negizgi baıqaýynda rejısser Erjanovtyń basqa da fılmi – «Álemniń meıirimdi enjarlyǵy» (Sh.Aımanov atyndaǵy «Qazaqfılm» AQ jobasy emes) qatysyp otyr.
«Negizgi baıqaýǵa olar dástúrli kınotilde túsirilgen fılmderdi qabyldaıdy, «Álemniń meıirimdi enjarlyǵy» osy formatqa sáıkes keledi. Al «Tún qudaıy» - sıýjet logıkasyn elemeı, obraz tazalyǵyn kórsetýge tyrysqan eksperımentaldy baǵyttaǵy fılmim. Qatarynan eki fılmim festıvalge qatysyp otyrǵany qýantady, óıtkeni olar formasy men mazmuny jaǵynan bir-birine qaıshy fılmder», - festıvalge qatysýy týraly osylaı dedi rejısser Ádilhan Erjanov.
Negizgi konkýrs jáne «Kórshiler/Dostar» baǵdarlamasynan basqa festıval aıasynda Ingmar Bergmannyń retrospektıvasy, azııalyq jáne reseılik anımasııa kórsetilimderi ótedi. Jáne qazylar alqasy - rejısserler kishi Alekseı German, Alekseı Popogrebskıı jáne Tamıneh Mılanıdiń, ssenarıster O Chjýn-mı jáne aktrısa Marııa Shýkshınanyń fılmderi kórsetiledi.