Batys Qazaqstan oblysynda shalǵaı eldi mekenderdi órtten qorǵaý maqsatynda 12 órt sóndirý beketi quryldy. Olar radıýsy 20 shaqyrym aýmaqtaǵy 40-tan astam eldimekenniń qaýipsizdigin qamtamasyz etpek. Bul jóninde Batys Qazaqstan oblystyq Tótenshe jaǵdaılar departamenti bastyǵynyń orynbasary, azamattyq qorǵaý maıory Nurlan Taýbekov málimdedi.
Byltyr Batys Qazaqstan oblysynda dala órti jıi shyǵyp, 10 myń gektardaı jer kúlge oranǵan edi. Bıyl jaz bastalǵaly 3224 ga dala, 80,7 ga orman órtendi deıdi tótenshelikter. Bıylǵy qýańshylyq, mal azyǵynyń tapshylyǵy jaǵdaıynda az órttiń de zardaby mol bolǵaly tur.
- 2018 jyly orman jáne dala órtteriniń aldyn alý jáne joıý úshin birqatar is-shara atqardyq. Bolýy múmkin qaterdi aldyn ala josparlap, tótenshe jaǵdaılardyń aldyn alý jáne joıý jónindegi komıssııa otyrysy ótkizildi. Oblys aýmaǵynda ǵaryshtyq monıtorıng júrgizý úshin «Ǵarysh sapary» UQ AQ-men kelisim-shart jasadyq, oǵan6,5 mln. teńge bólindi. Transshekaralyq aýmaqtarda tabıǵı órtterdi joıý Reseı Federasııasy Tótenshe jaǵdaılar mınıstrligi shekaralyq gýbernııalarymen kelisip, birlesken komandalyq-shtabtyq jattyǵý ótkizildi. Osynyń bári óziniń oń nátıjesin berip jatyr, - deıdi Nurlan Taýbekov.
Shalǵaı eldimekenderdi órtten qorǵaý beketteri búginde Bórli aýdanynynyń О́spen, Aqsý, Kırov aýyldarynda, Zelenov aýdanynyń Úlken shaǵan, Egindibulaq aýyldarynda, sonymen qatar Terekti aýdanynyń Ańqaty aýylynda, Qaztalov aýdanynyń Bolashaq aýylynda, Syrym aýdanynyń Toǵanas aýylynda, Aqjaıyq aýdanynyń Alǵabas aýylynda, Shyńǵyrlaý aýdanynyń Lýben aýylynda, Tasqala aýdanynyń 2-Shejin aýylynda jáne Bókeıorda aýdanynyń Uıaly aýylynda qurylǵan.
О́ńirde tabıǵı órttiń aldyn-alý jáne sóndirý úshin qazirgi ýaqytta 150 erikti órtke qarsy quralym qurylǵan. Erikti quralymdar quramynda 2966 adam qyzmet etedi. Olarǵa 9 avtosısterna, 448 basqa tehnıka, 1701 aspaly órt sóndirý quraly jáne 105 motopompa berilgen.
Batys Qazaqstan oblystyq Tótenshe jaǵdaılar departamenti BQO IID Jergilikti polısııa qyzmeti, Batys Qazaqstan oblystyq orman sharýashylyǵy jáne janýarlar dúnıesi aýmaqtyq ınspeksııasy qyzmetkerlerimen birge orman alqaptarynda, tabıǵı demalys oryndarynda reıd júrgizip, ormanda ot jaqqan tártipbuzýshylarǵa jalpy kólemi 265 100 teńgelik 22 hattama toltyrǵan eken.
Qazbek QUTTYMURATULY,
«Egemen Qazaqstan»
Batys Qazaqstan