Jambyl oblysynda jumys saparymen júrgen Parlament Senaty Tóraǵasynyń orynbasary Bektas Beknazarov pen Senat depýtaty Abdaly Nuralıev Býryl aýyldyq okrýgindegi "Iаshar" sharýa qojalyǵynda bolyp, egin alqaptarynyń jumysymen tanysty, dıqanshylarmen júzdesti.
94 gektar egistik jeri bar, oǵan qant qyzylshasy, dándik júgeri, jazdyq arpa, kópjyldyq shóp, qyzanaq egip, jıyrma bes adamdy eńbekpen qamtyp otyrǵan qojalyq ujymymen kezdesken Senat Tóraǵasynyń orynbasary «Elbasy Joldaýynda 5 jyl ishinde agroónerkásip keshenindegi eńbek ónimdiligin jáne óńdelgen aýyl sharýashylyǵyóniminiń eksportyn, kem degende 2,5 esege arttyrýdy mindettedi. Osy salaǵa jańa tehnologııalar men bıznes-modelderdi engizýdi tapsyrdy. Bul úshin agroónerkásip kesheniniń ǵylymǵa negizdelýin arttyrý sharýashylyqtardy kooperasııalaý basty baǵyt bolyp tabylady», -dep atap kórsetti.
Sonymen qatar, jumys sapary barysynda Senat depýtattary Botamoınaq aýyldyq okrýgindegi S.Ablanov atyndaǵy orta mektebi men jańa oqý jylynda el ıgiligine berilgeli otyrǵan úsh júz oryndyq №4 mektep lıseıiniń qurylys barysymen tanysty. «Adamı kapıtal – jańǵyrý negizi ekenin Elbasy únemi aıtyp keledi. Búginde tehnıka men tehnologııa kóz ilespes jyldamdyqpen tez damýda. Prezıdent bilim berý baǵdarlamalarynyń negizgi basymdyǵy retinde ózgeristerge únemi beıim bolý jáne jańa bilimdi meńgerý qabiletin damytý mindetin qoıyp otyr. Bul –mektep qabyrǵasynan bastap, joǵarǵy oqý oryndaryna deıin basty talap bolýǵa tıis», – dedi Senat Tóraǵasynyń orynbasary B.Beknazarov.
Sondaı-aq, senatorlar Kóktal aýylyndaǵy "Dýlat" sharýa qojalyǵynyń mal bordaqylaý alańynyń búgingi tynys-tirshiligimen tanysyp, ondaǵy jumystarǵa oń baǵasyn berdi. "Qazir Senat depýtattary barlyq óńirlerde júr. Olar oblystarda halyqtyń tilekteri men usynystaryn depýtattyq saýaldar arqyly nemese dóńgelek ústelderde, úlken jıyndarda kóterip, zańnamany ýaqyt talabyna sáıkestendirýge atsalysady. Qyrkúıek aıynyń basynda Parlament kezekti sessııasyn jalǵastyrady. Sonda osynda aıtylǵan máselelerdiń barlyǵy ortaǵa salynatyn bolady" -dedi.