Astanadaǵy Respýblıkalyq dıagnostıkalyq ortalyq taǵy bir onkologııalyq aýrýlardy erte anyqtaıtyn apparatpen tolyqty. Endi qazaqstandyqtar pozıtrondy emıssııalyq tomografııa (PET) zertteýinen tegin óte alady.
PET – ıadrolyq medısınadaǵy qazirgi zamanǵy joǵary tehnologııalyq dıagnostıkalaý ádisi. Atalǵan qurylǵy arqyly dıagnoz anyqtaý Orta Azııa kóleminde alǵash ret bizdiń elde, naqtyraq aıtqanda osy Respýblıkalyq dıagnostıkalyq ortalyqta 2010 jyldan bastalǵan bolatyn. Ortalyq mamandary ekinshi apparattyń ákelinýi jumysty eki esege deıin arttyratynyn aıtady.
«PET arqyly bizqaterli isiktiń alǵashqy satysyn molekýla deńgeıinde anyqtap qana qoımaı, dárigerlerdiń durys em taǵaıyndaýǵa da kómektese alamyz. Jasalǵan emniń áserin baqylaý da osy apparat arqyly júzege asady. Jańa tehnologııanyń taǵy bir ereksheligi – bir ýaqytta kompıýterlik tomografııa (KT) jáne pozıtrondy emıssııalyq tomografııa (PET) sııaqty eki túrli zertteý júrgize alamyz. Osy arqyly kardıologııa salasynda mıokardtaǵy zat almasý aýytqýshylyǵyn naqtylaýǵa bolsa, bul ádisti dárigerler epılepsııa oshaǵyn anyqtaýǵa da keńinen qoldanady»,deıdi «RDO» AQ radıoızotoptyq dıagnostıka bóliminiń meńgerýshisi Ǵalııa Rysqulova.
Sondaı-aq bul apparat sońǵy býyndaǵy, jetildirilgen eń ozyq túri bolyp, 64 kesindilik kompıýterlik tomografııasy adam aǵzasyn barynsha jiti zertteıdi. Jańa baǵdarlamasy sábıden bastap eresekterge deıingi barlyq adamdardy salmaǵyn esepke ala otyryp, skanerleıdi jáne aldyńǵysymen salystyrǵanda zertteý az ýaqyt ishinde jasalady. Ári apparatty basqarý da qıyn emes ekenin aıtady mamandar. «Bizde jańa qurylǵymen jumys jasaıtyn 6 dáriger bar. Barlyǵymyz Germanııa, Izraıl, AQSh, Anglııa sııaqty elderden oqyp keldik. Úsh jylda bir ret biliktilikti arttyrýǵa baryp otyrmamyz», deıdiǴ.Rysqulova
Mamandardyń aıtýynsha, «UMC» korporatıvtik qorynyń Respýblıkalyq dıagnostıkalyq ortalyǵynda naýqastardyń 95%-dan astamy zertteýdiń bul túrinen kepildik berilgen medısınalyq qyzmet aıasynda tegin ótedi. Aqyly negizde zertteýdiń quny – 235 700 teńge. Ony qazaqstandyqtardan bólek, kóbinese alys-jaqyn shetelderden kelgen emdelýshiler paıdalana alady.
Maıgúl Sultan,
«Egemen Qazaqstan»