Joǵary Sot Keńesiniń Tóraǵasy Talǵat Donaqovtyń basshylyǵymen Keńestiń kezekti otyrysy ótti, dep habarlady Qazaqstan Respýblıkasy Joǵary Sot Keńesiniń apparaty.
Otyrys jumysyna zań qaýymdastyǵynyń ókilderi qatysty.
Keńes otyrysynyń qorytyndylary boıynsha bos sýdıa laýazymdaryna konkýrsty ótkizý tártibin jańǵyrtyp, Joǵary Sot Keńesiniń jumysynda josparlaýdy qamtamasyz etý jónindegi usynystar maquldandy, ol 2019 jyldan bastap qoldanysqa engiziletin bolady. Sonymen qatar Keńes bıylǵy qyrkúıekten bastap sýdıa laýazymyna biliktilik emtıhanyn ótkizýdiń jańa júıesin engizý, sýdıalardyń bos oryndaryna ornalasýǵa konkýrsqa qatysýshy kandıdattardy baǵalaý jáne irikteý krıterıılerin odan ári jetildirý jóninde sheshim qabyldady. Osyǵan oraı Keńes reglamentine tıisti túzetýler bekitildi.
Sonymen birge Keńes janyndaǵy Biliktilik komıssııasynyń quramyna ózgerister engizildi, onyń quramyna shetel sarapshylary men HR-maman kirdi.
Odan basqa Keńes janynda turaqty negizde jumys isteıtin sarapshylyq-konsýltatıvtik komıssııa qurý týraly sheshim qabyldandy, ol ulttyq zańnama men sot júıesin jetildirýge qatysty máselelerdi qaraıdy.
Sonymen qatar Keńes zeınetkerlik jasqa tolǵan tórt sýdıanyń qyzmette bolý merzimin uzartýǵa kelisim jáne 15 sýdıany laýazymdarynan bosatýǵa usynym berdi.
Keńes otyrysynda mamandandyrylǵan tergeý sottarynyń tóraǵalary men sýdıalarynyń bos oryndaryna ornalasýǵa 2018 jyly 12 maýsymda jarııalanǵan konkýrstyń qorytyndylary jasaldy.
Keńes otyrysynyń qorytyndylary boıynsha tıisti sheshimder men usynymdar qabyldandy.