Memlekettik hatshy Gúlshara Ábdiqalyqovanyń tóraǵalyǵymen Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti.
Otyrysty ashqan G.Ábdiqalyqova Elbasy N.Nazarbaevtyń «Kún sanap ózgerip jatqan dúbirli dúnıede sana-sezimimiz ben dúnıetanymymyzǵa ábden sińip qalǵan taptaýryn qaǵıdalardan arylmasaq, kósh basyndaǵy eldermen terezemizdi teńep, ıyq túıistirý múmkin emes. О́zgerý úshin ózimizdi myqtap qolǵa alyp, zaman aǵymyna ıkemdelý arqyly jańa dáýirdiń jaǵymdy jaqtaryn boıǵa sińirýimiz kerek», degen sózine basa nazar aýdardy.
Memlekettik hatshy «Rýhanı jańǵyrý», «Prezıdenttiń bes áleýmettik bastamasy» baǵdarlamalary qoǵamdyq sanany jańǵyrtýǵa jáne ómir súrý sapasyn arttyrýǵa baǵyttalǵanyn atap ótti. Bul turǵyda óskeleń urpaqtyń rýhanı-adamgershilik qasıetterin damytý jáne olardyń quqyqtary men zańdy múddelerin qamtamasyz etý máseleleri erekshe mánge ıe bolyp otyr.
Qazaqstanda balalardyń quqyqtary men múddelerin qamtamasyz etý úshin ınstıtýsıonaldyq negiz qurylǵan. Bul rette 15 halyqaralyq qujat ratıfıkasııalandy, Balalar quqyqtary jóninde ýákil ınstıtýty, Balalardyń quqyqtaryn qorǵaý komıteti, qıyn ahýaldaǵy balalarǵa qoldaý kórsetý ortalyqtary jumys isteıdi.
«О́zin-ózi taný» adamgershilik-rýhanı bilim berý baǵdarlamasy 71 bilim berý uıymynda qanatqaqty joba retinde iske qosylǵan. Sonymen qatar kámeletke tolmaǵandar arasyndaǵy zorlyq-zombylyqtyń aldyn alýǵa baǵyttalǵan «Balalardy birge qorǵaımyz» atty jol kartasy Bas prokýratýramen birlese júzege asyrylyp keledi. Búginde mektepterde 8 362 psıholog, 4 268 áleýmettik pedagog, 2 177 polısııa ınspektory qyzmet etedi.
Densaýlyq saqtaý mınıstrliginiń málimetine súıensek, elimizde ana óliminiń deńgeıi 2017 jyly 1,5 prosentke, balalar ólimi 7 prosentke tómendedi. О́ńirlerde 60 úkimettik emes uıymdardyń qatysýymen otbasyn josparlaý, ana men bala densaýlyǵyn qorǵaý boıynsha 112 áleýmettik joba iske asyryldy. Bes jasqa deıingi balalarǵa patronajdyq profılaktıkalyq baqylaý júrgizilip, 600-den astam balalar densaýlyǵy bólmeleri uıymdastyryldy. Jastar densaýlyqty saqtaý máseleleri boıynsha konsýltasııalyq, zań jáne medısınalyq-psıhologııalyq kómek kórsetiledi.
Otyrys sońynda G.Ábdiqalyqova memlekettik organdarǵa birqatar naqty tapsyrmalar berdi.
Abaı ASANKELDIULY, «Egemen Qazaqstan»