Indonezııada ótip jatqan Jazǵy Azııa oıyndary da bel ortasyna jetti. Qazirshe Qazaqstan quramasy medal sany boıynsha jalpykomandalyq esepte 11-orynda keledi.
Velosport boıynsha toptyq jarys kezeńinde top jarǵan otandasymyz Alekseı Lýsenko jekeleı synda da ózin Azııadaǵy eń myqty veloshabandoz ekenin taǵy bir márte dáleldedi. Ol 40 shaqyrym joldy 55:37:13 ýaqyt júrip ótip, Azıadanyń ekinshi altyn júldesin jeńip aldy. Osylaısha, Alekseı Lýsenko Azııa oıyndarynda eki dúrkin jeńimpaz atanyp, Qazaqstan qorjynyna úshinshi altyn júldeni saldy. Shyndyǵynda Azıadaǵa Alekseı barmasa, qaıter edik?!
Sondaı-aq djıý-djıtsý sportynyń ókili Darhan Nortaev (62 kg) el qorjynyna tórtinshi altyn júldeni saldy. Nortaev fınaldyq aıqasta Birikken Arab Ámirlikteriniń sportshysy Omar ál-Fadlıdi jeńip, djıý-djıtsýdan qazaq sportshylary arasynda tuńǵysh Azııa oıyndarynyń chempıony atandy. Sebebi djıý-djıtsý sporty Azıadaǵa bıyl ǵana qosyldy.
Al kúmis júldeni Denıs Evseev pen Aleksandr Býblık jeńip aldy. Juptasyp synǵa túsýde tennısshilerimiz fınalda úndistandyq sportshylarǵa ese jiberdi. Qola medaldi djıý-djıtsý sportshylary Nurjan Seıdýálı (56 kg) men Nartaı Qajekov (69 kg), Rızat Maqashev (94 kg), tennısten qyzdar arasyndaǵy juptasyp synǵa túsýden Anna Danılına men Gozal Aınıtdınova, sondaı-aq juptasyp óner kórsetýde Anna Danılına men Aleksandr Nedovesov, sýda júzý sporty boıynsha Dmıtrıı Balandın men Qazaqstan quramasy jáne ıadro laqtyrýdan Ivan Ivanov jeńip aldy.
Komandalyq esepte Qytaı kósh bastap keledi – 153 medal (72 altyn). Ekinshi oryndaǵy Japonııada 109 júlde (34 altyn), úshinshi oryndaǵy Ońtústik Koreıada 84 medal (25 altyn) bar.