Tabıǵatpen tamyrlas talǵam

Jurtshylyqtyń nazaryna usynylǵan 50-ge jýyq týyndyda «aq qaıyńdar» ólkesiniń tilmen jetkize almas sulý tabıǵaty, jan jadyratar, ómirge yntyqtyrar, adam boıynda tolqynysty sezim­der týdyrar ǵajaıyp kelbeti, ishke búkken tylsym syrlary ár qy­rynan beınelenip, ata­meken­ge, qorshaǵan ortaǵa degen erekshe súıispenshilik, per­zent­­tik mahabbat anyq ańǵary­lady. Jyl mezgilderine arnal­ǵan «Ormandaǵy kesh», «Bıshi qaıyń­dar», «Esil ózeni jaǵa­synda», taǵy basqa shyǵarmalary avtorǵa tán qoltańbany aıshyqtaı túsedi.

Jeke kásipkerlikpen shuǵyl­danatyn Vıacheslav Borısovıchtiń hobbılary kóp. Balyq aýlaýmen, ańshylyqpen, sportpen aınalysady. Desek te sýret salý ómiriniń bólinbes bir bólshegine aınalyp ketkenin, ilkimdi isine kiriskende bar dúnıeni umytyp, aıryqsha lázzat, rýhanı kúsh alatynyn ózi de jasyrmaıdy. Bir kartınasy Qazaqstan Prezıdentiniń rezıdensııasynda, al endi biri Leonıd Iаkýbovıch júrgizetin «Tańǵajaıyp alań» telehabarynyń mýzeıinde saq­taýly. TMD men Eýropa elderi de suratyp alǵan kórinedi. Astana­da uıymdastyrylǵan shyǵar­­ma­shy­lyq keshinde bir­neshe týyndysy qolma-qol saty­lyp ketip­ti. Osydan-aq arnaıy oqý ornyn taýyspasa da ónersúıer qaýym ortasynda tany­mal­dy­ǵyn, boıǵa qonǵan talan­tynyń arqa­synda kásipqoı sýret­shi dáre­jesine kóterilgenin baǵam­daýǵa bolady. Tabıǵat-ana­nyń tamasha kórinisterin qyl­qalam arqyly «sóılete» bilgen onyń qarym-qabileti Otan aldyn­daǵy azamattyq boryshyn ótep júr­gende tanylypty. Áýes­qoı­lyq kóńil kúı keıin kele qalyp­ty mashyqqa aýysyp, sodan beri súıikti taqyry­bynan bir eli ajy­raǵan emes. Murajaı qyz­met­­ker­leri ony orystyń ataq­ty qyl­qalam sheberi Ivan Shıshkınge uqsa­typ, «Týǵan jerdiń jyrshy­sy» deıdi eken. Qazir onyń qoryn­da bir myńnan astam kartına bar.

V.Smırnov Qazaqstan Sýret­shiler odaǵynyń múshesi retinde shyǵar­ma­shylyq tájirı­besin óz jolyn qýǵan shákirt­teri­men bólisip, úıretýdi jalǵas­tyryp keledi.

О́mir ESQALI, «Egemen Qazaqstan» Soltústik Qazaqstan oblysy