Alataý bókterindegi «Kóktóbe» demalys saıabaǵynda «Almaty Kóktóbe Opera-2018» festıvali ótti. Ashyq aspan astynda úshinshi márte uıymdastyrylǵan otyrǵan osy keremet shara barysynda álemdik klassıkanyń jaýhar týyndylary shyrqaldy.
Joǵary talǵammen toptastyrylǵan konserttik baǵdarlamada álemdik klassıkalyq mýzykanyń altyn qoryna engen týyndylar men ulttyq ónerimizdiń jaýharlary sheber úılestirildi. Sımfonııalyq orkestrdiń súıemeldeýimen Abaı atyndaǵy Qazaq memlekettik akademııalyq opera jáne balet teatrynyń tanymal solısteri men opera juldyzdary álemniń eń úzdik kompozıtorlarynyń týyndylaryn oryndady. Osy keshtiń basty qonaǵy – áıgili ıtalııalyq tenor, 2014 jyly Dohada «Jańa býyn» atalymy boıynsha «Oscar Della Lirica» júldesiniń ıegeri atanǵan Vınchenso Kostansonyń da óneri keremet áser qaldyrdy.
Eki kúnge sozylǵan konsert barysynda Kóktóbede Ahmet Jubanov, Latıf Hamıdı, Petr Chaıkovskıı, Sharl Gýno, Leo Delıb, Tomazo Albınonı, Djakamo Pýchchını, Gaetano Donısettı, Djýzeppe Verdı, Frans Legar, Djaokkıno Rossını, Jorj Bızeniń tamasha týyndylary men qazaqtyń halyq ánderi shyrqaldy. Ataqty dırıjer, Qazaqstan Respýblıkasynyӊ eӊbek siӊirgen ártisi Alan Bóribaevtyӊ jetekshiligimen Abaı atyndaǵy Qazaq Memlekettik Akademııalyq opera jáne balet teatrynyӊ sımfonııalyq orkestri álemdik klassıkalyq mýzyka óneriniń shyǵarmalaryn óte sheber oryndady.
Ǵalym SÚLEIMEN,
«Egemen Qazaqstan» ALMATY