Astanada Qazaqstan Syrtqy saýda palatasynyń basqarma tóraǵasy Aıan Erenov Qytaı halyqaralyq saýda palatasy bas ókiliniń orynbasary Gao Sımen kezdesti, dep habarlaıdy Palatanyń baspasóz qyzmeti.
Taraptar uzaq merzimdi yntymaqtastyqtyń baǵyttary men perspektıvalaryn, Qytaı Halyq Respýblıkasy men Qazaqstan arasyndaǵy qazirgi saýda baılanystaryn nyǵaıtý máselelerin talqylady. Kezdesý qorytyndysynda yntymaqtastyq týraly kelisim men tájirıbe almasý týraly ýaǵdalastyqqa qol jetkizildi.
Qytaı halyqaralyq saýda palatasy 1988 jyly QHR Memlekettik Keńesiniń maquldaýymen qurylǵan, ol Búkilqytaı saýda palatasy bolyp tabylady. Onyń quramyna Qytaıda halyqaralyq kommersııa qyzmetimen aınalysatyn kásiporyndar, birlestikter jáne basqa uıymdar kiredi. Qazirgi kezde palataǵa 150 myńnan astam jekemenshik jáne memlekettik kásiporyndar múshe bolyp otyr.
Qytaı halyqaralyq saýda palatasynyń Qazaqstan Respýblıkasyndaǵy ókildigi ústimizdegi jyldyń naýryzynda ashylǵan bolatyn. 2005 jyldan 2017 jylǵa deıingi aralyqta Qazaqstanǵa QHR-dan kelgen jalpy ınvestısııalar aǵyny 14,9 mlrd AQSh dollaryn, keri baǵyttaǵy ınvestısııalar 487,4 mln dollardy qurady. Qazaqstanda QHR-dyń qatysýymen 3 myńdaı zańdy tulǵa tirkelgen, sonyń 1200-den astamy qyzmet júrgizip keledi. 2017 jyldyń qorytyndylaryna oraı Qazaqstannyń Qytaımen syrtqy saýdasy 32,6% ósip, 10 mlrd dollardan asyp jyǵylǵan. Qazaqstannan 5,77 mlrd AQSh dollarynyń taýarlary men qyzmetteri eksporttaldy, bul 2016 jylmen salystyrǵanda 36,6% artyq.