14 eldiń, sonyń ishinde, Qazaqstannyń tanymal ǵalymdary Bishkekte ótip jatqan Altaı tilderi týystas halyqtarynyń mádenıeti men tarıhyn zertteýshilerdiń halyqaralyq konferensııasyna qatysýda.
Altaıster konferensııasy dástúrli túrde jyl saıyn ótkizilip keledi. «Mundaı dástúr zertteýshiler men ǵalymdardyń altaı murasynyń mádenıeti men tarıhyn zertteýge degen zor qyzyǵýshylyǵyn kórsetedi», - dedi Qyrǵyzstannyń prezıdenti Sooronbaı Jeenbekov.
«Jyl saıynǵy halyqaralyq konferensııa altaıst-ǵalymdar úshin Altaı órkenıetiniń tilderi men mádenıetin, murasyn zertteý barysyndaǵy sońǵy ǵylymı jańalyqtardy talqylaýǵa jáne basqa da zertteýshilermen keńinen pikir almasýǵa múmkindik beredi», - dedi Qyrǵyzstannyń el basqarýshysy.
El prezıdenti Altaı órkenıetine qatysty Pamır-Altaı, Tıan Shan taýlarynan Saıan Altaı men Enıseıge deıingi aýmaqtyń tabıǵaty, taýlary men ormandary, dalasy men ózenderi bir ekenin aıtty. Ǵalymdar úshin máńgilik kóshpendi órkenıetti zertteý - tańǵalarlyq erekshe taqyryp bolyp qala beredi. Tarıh ǵylymynda «Halyqtardyń uly kóshi» ataýymen tanymal prosestiń altaı órkenıetimen baılanysy bar ekeni belgili. Bul mádenıetaralyq almasýdy kúsheıtip, til, antropologııalyq jáne násildik ózgeristerge alyp keldi. Sondaı-aq, ǵun, túrik, qyrǵyz, mońǵol, mámlúk, tımýrıd, osman, aýstro-majar syndy jańa ımperııalar paıda boldy. Konferensııa 30 tamyzǵa deıin jalǵasady. Jıynnyń qorytyndysyna sáıkes, Altaı órkenıetiniń beımálim tustary týraly arnaıy jınaq shyǵarý josparlanǵan.