Búgin QR Prezıdenti Ákimshiliginiń basshysy Ádilbek Jaqsybekov Germanııa Federatıvtik Respýblıkasynyń delegasııasymen kezdesti.
Ádilbek Jaqsybekov elimizdiń memlekettik organdarynyń birinshi basshylary birqatar shet memleketke baryp, olardyń qylmystyq prosess modelin, sot óndirisin zerdelep qaıtqandyǵyn atap ótti. Bıylǵy jyldyń maýsym aıynda qazaqstandyq delegasııa Germanııada bolyp, quqyq qorǵaý organdary men sottardyń jumystaryn uıymdastyrý barysymen tanysyp qaıtqan.
«Endigi ýaqytta bizdiń shaqyrýymyzben germanııalyq mamandar Qazaqstanǵa kelip, ózderiniń oń tájirıbelerimen bólisýge daıyn. Sheteldik áriptesterimizdiń jáne olardyń úlken tájirıbesiniń arqasynda biz úshin mańyzdy barlyq suraqtarǵa jaýap alamyz dep oılaımyn», dedi Ádilbek Jaqsybekov.
О́z kezeginde Maındaǵy Frankfýrt qalasynyń bas prokýrory Albreht Shraıber Germanııada prokýratýra qylmystyq qýdalaý organy bolyp sanalatynyn atap ótti.
«Germanııada qylmystyq is júrgizý zańnamasynyń tarıhy 140 jyldan asyp jyǵylady. Bul qylmystyq is júrgizýdiń uzaq merzimdi qalyptasýy sanalady. Barlyq jerdegideı, árbir zań sáıkesinshe qoǵamdyq ózgeristerge beıimdelýi tıis. Bizdiń qylmystyq is júrgizý kodeksimiz de uzaq jyldar boıy kóptegen ózgeristerge ushyrady», dedi Albreht Shraıber.
Sondaı-aq, kezdesý barysynda qylmystyq prosesti uıymdastyrýdyń progressıvti halyqaralyq standarttary, sonymen qatar Qazaqstannyń quqyq qorǵaý júıesin jańǵyrtý jónindegi tásilder talqylandy.